మహబూబాబాద్,(విజయక్రాంతి): అక్రమంగా లేలాండ్ మినీ ట్రాలీలో  రవాణా చేస్తున్న 45 బస్తాల నల్లబెల్లం, 5 బస్తాల పటిక ను మహబూబాబాద్ జిల్లా నెల్లికుదురు పోలీసులు శుక్రవారం పట్టుకున్నారు. ఈ ఘటనలో ఐదుగురు వ్యక్తులపై కేసు నమోదు చేసి బెల్లం, పటిక, వాహనాన్ని స్వాధీనం చేసుకున్నట్లు నెల్లికుదురు ఎస్సై చిర్రా రమేష్ బాబు తెలిపారు. కర్ణాటకలోని బీదర్ నుంచి మహబూబాబాద్ జిల్లా పరిసర ప్రాంతాల్లో నాటు సారా తయారీకి వినియోగించే బెల్లం, పటిక ను తెచ్చి విక్రయిస్తున్నారని నమ్మదగిన సమాచారం మేరకు నెల్లికుదురు క్రాస్ రోడ్ వద్ద వాహన తనిఖీలు నిర్వహిస్తుండగా, బెల్లం, పటిక అక్రమ రవాణా దందా వెలుగు చూసిందన్నారు. ఈ సంఘటనకు బాధ్యులైన ఐదుగురు పారిపోయారని, పట్టుకున్న బెల్లం, పటిక విలువ 2.50 లక్షలు ఉంటుందన్నారు.