టీయూడబ్ల్యూజే (ఐజేయూ) జిల్లా అధ్యక్షడు అబ్దుల్ రహమాన్..

కుమ్రం భీం ఆసిఫాబాద్ (విజయక్రాంతి): జర్నలిస్టుల సమస్యలతో ఆనేక ఇబ్బందులు ఎదుర్కొంటున్నారని టీయూడబ్ల్యూజే(ఐజేయూ) జిల్లా అధ్యక్షడు అబ్దుల్ రహమాన్ ఆవేదన వ్యక్తం చేశారు. శనివారం వాంకిడి మండల కేంద్రంలో జర్నలిస్టుల మహా ధర్నాకు సంబంధించిన కరపత్రాలు ఆవిష్కరించారు. ఈ సందర్భంగా ఆయన మాట్లాడుతూ స్వరాష్ట్రంలో బతుకులు మెరుగు పడతాయని తెలంగాణ ఉద్యమంలో కీలక పాత్ర పోషించి, పోరాడి సాధించుకున్న తెలంగాణ రాష్ట్రంలో కూడా జర్నలిస్టుల సమస్యలు పరిష్కారం కాకపోవడం సిగ్గుచేటు అన్నారు.

అక్రెడిటేషన్ పాలసీని వెంటనే ప్రకటించి కొత్త కార్డులు జారీ చేయాలని, ఆరోగ్య భీమా పథకాన్ని వెంటనే పునరుద్ధరించాలని, అర్హులైన జర్నలిస్టులందరికీ ఇళ్లస్థలాలు మంజూరు చేయాలని డిమాండ్ చేశారు. జర్నలిస్టుల న్యాయమైన డిమాండ్ల సాధన కోసం డిసెంబర్ 3 తేదీన హైదరాబాద్ లోని సమాచార కమిషనర్ కార్యాలయం ఎదుట మహా ధర్నా కార్యక్రమానికి జిల్లాలోని జర్నలిస్టులు అధిక సంఖ్యలో తరలివచ్చి జయప్రదం చేయాలని కోరారు. ఈ కార్యక్రమంలో జిల్లా నాయకులు సురేష్ చారి, రాధాకృష్ణ చారి, సినియర్ పాత్రికేయులు దుర్గం సునీల్, పాత్రికేయులు అల్లోజ రవీంద్ర చారి, విభుతి శివశంకర్ తదితరులు పాల్గొన్నారు.