- రాజ్యసభ సభ్యుడు అనిల్ కుమార్ యాదవ్

- నాగోల్ లో అఖిల భారత యాదవ మహాసభ సమ్మేళనం

- జూబ్లీహిల్స్ ఎమ్మెల్యే నవీన్ యాదవ్ కు ఘన సన్మానం

ఎల్బీనగర్: కాంగ్రెస్ పార్టీతోనే యాదవులకు రాజ్యాధికారం సాధ్యమని రాజ్యసభ సభ్యుడు అనిల్ కుమార్ యాదవ్ అన్నారు. నాగోల్ లోని శుభం కన్వెన్షన్ హాల్ లో శనివారం అఖిల భారత యాదవ మహాసభ తెలంగాణ రాష్ట్ర కమిటీ సమ్మేళనం నిర్వహించారు. ఈ సందర్భంగా జూబ్లీహిల్స్ అసెంబ్లీ ఉప ఎన్నికలో విజయం సాధించిన వల్లాల నవీన్ యాదవ్ ఆత్మీయ సన్మాన సభ నిర్వహించారు. సభకు ముఖ్య అతిథిగా పాల్గొన్న అనిల్ కుమార్ యాదవ్ మాట్లాడుతూ... రాష్ట్రంలో అత్యధిక జనాభా కలిగిన యాదవులు రాజకీయ, సామాజిక, ఆర్ధిక వెనుకబడిపోయారని  అందుకు ముందుకు రావాలంటే సమిష్టి బలం అవసరమన్నారు.

స్వాతంత్రం వచ్చినప్పటి నుంచి ఎన్ని రాజకీయ పార్టీలు ఉనప్పటికీ సరైన గుర్తింపు రాలేదని, నేడు కాంగ్రెస్ పార్టీ ముఖ్యమంత్రిగా రేవంత్ రెడ్డి నాయకత్వంలో యువతను ప్రోత్సహించాలని ముందుకు సాగడంతో యాదవ సామాజిక వర్గానికి అవకాశాలు, సరైన గుర్తింపు లభిస్తుందన్నారు. తాను యువజన కాంగ్రెస్ నుంచి జాతీయ స్థాయికి ఎదిగినందుకు పార్టీ గుర్తింపు ఇచ్చి రాజ్యసభకు పంపిందని అనిల్ కుమార్ గుర్తుచేశారు. జూబ్లీహిల్స్ ఉప ఎన్నికల్లో నవీన్ యాదవ్‌పై నమ్మకం ఉంచి టికెట్ ఇచ్చిన పార్టీ నిర్ణయం సముచితం అయ్యిందని, ఆయన గెలుపు కోసం పార్టీ నాయకులు, కార్యకర్తలు కృషి చేశారని పేర్కొన్నారు. జూబ్లీహిల్స్ ఎమ్మెల్యే వల్లాల నవీన్ కుమార్ మాట్లాడుతూ... నిస్వార్థానికి నిలువుటద్దం యాదవ సామాజిక వర్గం అని అన్నారు. యాదవ సామాజిక వర్గం  సహాయ సహకారాలు లేని ఏ రాజకీయ పార్టీ కూడా మనుగడ సాధించలేక పోయిందన్నారు.

40 సంవత్సరాలుగా అన్ని రాజకీయ పార్టీలు ఎన్ని ఇబ్బందులు గురి చేసినా ఎన్ని కేసులు పెట్టినా ఎన్ని అవమానాలు చేసినా వాటన్నింటినీ తట్టుకొని నిలబడినందుకే ముఖ్యమంత్రి రేవంత్ రెడ్డి గుర్తించి జూబ్లీహిల్స్ అసెంబ్లీ నియోజకవర్గం ఉప ఎన్నికల్లో అవకాశం కల్పించడం దీంతో అందరి సహాయ సహకారాలు ఆదర అభిమానాలు ఆశీర్వాదం పొంది, విజయం సాధించానన్నారు. హైదరాబాద్ నగరంలో యాదవ సామాజిక వర్గానికి హాస్టల్ భవనం కోసం ముఖ్యమంత్రితో మాట్లాడి త్వరలో నిధులు మంజూరు కోసం కృషి చేస్తానని అన్నారు. రాష్ట్ర పోలీస్ కంప్లైంట్స్ అధారిటీ సభ్యుడు డాక్టర్ వర్రె వెంకటేశ్వర్లు మాట్లాడుతూ... ముఖ్యమంత్రి రేవంత్ రెడ్డి యాదవులకు అధిక ప్రాధాన్యత ఇస్తున్నారన్నారు. యాదవ కులస్తులంతా సీఎం రేవంత్ రెడ్డి వెంబడి ఉంటరని తెలిపారు. కార్యక్రమంలో యాదవ మహాసభ రాష్ట్ర అధ్యక్షుడు చింతల రవీంద్రనాథ్ యాదవ్, నేషనల్ జనరల్ సెక్రటరీ ఆర్.లక్ష్మణ్ యాదవ్, రాష్ట్ర యూత్ అధ్యక్షుడు యశ్వంత్, రాష్ట్ర సెక్రటమ్ దొంతి బోయిన  శ్రీనివాస్ యాదవ్, రాష్ట్ర విఫ్ ఎం.రాజేందర్ తదితరులు పాల్గొన్నారు.