హైదరాబాద్: యెమెన్ జైలులో ఉన్న భారతీయ నర్సు నిమిష ప్రియ(Nimisha Priya) విడుదల కానుందని ప్రజాశాంతి పార్టీ నేత కేఏ పాల్(KA Paul) సూచించారు. యెమెన్ లో మరణశిక్ష పడిన కేరళ నర్సును జైలు నుంచి విడిపించే ప్రయత్నం చేస్తున్నానంటూ కేఏ పాల్ ఎక్స్ లో పోస్టు చేశారు. ఆమె జైలు నుంచి విడుదల కాబోతోందని పాల్ తెలిపారు. అయితే నిమిష ప్రియ విడుదలపై యెమెన్ నుంచి ఎలాంటి అధికారిక ప్రకటన వెలువడలేదు.

యెమెన్ జాతీయుడు తలాల్ అబ్దో(Yemeni national Talal Abdo Mahdi) మహదీ హత్య కేసులో యెమెన్ రాజధాని సనాలోని సెంట్రల్ జైలులో మరణశిక్ష అనుభవిస్తున్న 37 ఏళ్ల భారతీయ నర్సు నిమిషా ప్రియకు ఇది శుభవార్తే. రెండు వారాల క్రితం వెలువడిన మీడియా నివేదికలు ఆమెకు జూలై 16న ఉరిశిక్ష అమలు చేయాలని నిర్ణయించినట్లు పేర్కొన్నాయి. చివరి నిమిషంలో దౌత్యపరమైన, ఇతర జోక్యాల ఫలితంగా ఆమెకు శిక్ష వాయిదా పడటంతో ఆమె కుటుంబ సభ్యులు, శ్రేయోభిలాషులు ఆశతో ఉన్నారు. అయితే, బాధితుడి సోదరుడు అబ్దుల్ ఫతా మహదీ సోషల్ మీడియా పోస్ట్‌లో "న్యాయం గెలుస్తుంది" అని, "ఉరిశిక్ష అమలులో ఏవైనా జాప్యాలు ఉన్నా ప్రతీకారం తీర్చుకుంటాం" అని పేర్కొన్నారు.

కేరళకు చెందిన నిమిషా అనే నర్సు తన వ్యాపార భాగస్వామి మహదీని హత్య చేసిన కేసులో 2017 నుండి సనా సెంట్రల్ జైలులో(Sana'a Central Jail) జైలు శిక్ష అనుభవిస్తోంది. పాలక్కాడ్ జిల్లాలోని కొల్లెంగోడ్‌కు చెందిన ఆమె, ఇంటి పనిమనిషిగా పనిచేసే తన తల్లిదండ్రులకు మెరుగైన భవిష్యత్తును కల్పించాలనే కలలతో 2008లో యెమెన్‌కు వెళ్లింది. సనాలోని ప్రభుత్వ ఆసుపత్రిలో ఉద్యోగం సంపాదించింది. 2011 వరకు అక్కడే పనిచేసి, ఇడుక్కి జిల్లాలోని తోడుపుళకు చెందిన రోజువారీ కూలీ టామీ థామస్‌ను వివాహం చేసుకోవడానికి కేరళకు తిరిగి వచ్చింది.