న్యూఢిల్లీ: ఆపరేషన్ సిందూర్(Operation Sindoor)పై చర్చతో సహా వివిధ అంశాలపై ప్రతిపక్ష సభ్యులు నినాదాలు చేయడంతో లోక్‌సభ(Lok Sabha Adjourned) మధ్యాహ్నం 2:00 గంటల వరకు వాయిదా పడింది. మొదటి వాయిదా తర్వాత మధ్యాహ్నం 12 గంటలకు సభ సమావేశమైనప్పుడు, కాంగ్రెస్, ఎస్పీ, డీఎంకే, ఇతరులకు చెందిన ప్రతిపక్ష సభ్యులు తమ నినాదాలు చేస్తూ సభ వెల్ వద్దకు వచ్చారు. ప్రతిపక్ష సభ్యులు తమ స్థానాల్లో కూర్చుని జీరో అవర్‌లో పాల్గొనాలని ప్రిసైడింగ్ అధికారి పదే పదే విజ్ఞప్తి చేశారు.

చర్చ అజెండాను నిర్ణయించడానికి మధ్యాహ్నం 2:30 గంటలకు బిజినెస్ అడ్వైజరీ కమిటీ సమావేశం జరుగుతుందని పార్లమెంటరీ వ్యవహారాల మంత్రి కిరణ్ రిజిజు(Kiren Rijiju) అన్నారు. ప్రభుత్వం చర్చకు సిద్ధంగా ఉంది, కానీ ప్రతిపక్ష ఎంపీలు సభలో నిరసన తెలుపుతున్నారు, ఇది సరైనది కాదన్నారు. ఏ అంశంపై ప్రతిపాదించినా చర్చకు ప్రభుత్వం పూర్తిగా సిద్ధంగా ఉందని రక్షణ మంత్రి, లోక్‌సభలో ఉప నాయకుడు రాజ్‌నాథ్ సింగ్(Rajnath Singh) అన్నారు. అయితే ప్రతిపక్ష సభ్యులు నినాదాలు చేస్తూనే ఉండటంతో సభ మధ్యాహ్నం 2:00 గంటల వరకు వాయిదా పడింది.

అంతకుముందు, లోక్‌సభ ఉదయం 11 గంటలకు సమావేశమైనప్పుడు, దాని ఎనిమిది మంది మాజీ సభ్యులకు నివాళులు అర్పించింది. పహల్గామ్ ఉగ్రవాద దాడి, ఎయిర్ ఇండియా AI-171 విమాన ప్రమాదంలో(Air India plane crash) మరణించిన వారికి సభ నివాళులు అర్పించింది. వివిధ రాష్ట్రాల్లో ప్రకృతి వైపరీత్యాలలో ప్రాణనష్టం, ఆస్తుల నష్టంపై కూడా సభ విచారం వ్యక్తం చేసింది. అంతర్జాతీయ అంతరిక్ష కేంద్రానికి విజయవంతంగా ప్రయాణించినందుకు ఇస్రో, గ్రూప్ కెప్టెన్ సుభాన్షు శుక్లాను లోక్‌సభ స్పీకర్ ఓం బిర్లా అభినందించారు. ఈ విజయంపై సభలో వివరణాత్మక చర్చ జరుగుతుందన్నారు.