తలైవాతో కమల్ చిత్రం ఖరారు

సూపర్ స్టార్ రజనీకాంత్ ప్రస్తుతం వరుస సినిమాలతో అలరించేందుకు సిద్ధమవుతున్నారు. ఇప్పటికే ‘జైలర్2’లో నటిస్తున్న తలైవా త్వరలో మరో సంచనల కాంబినేషన్‌కు ఓకే చెప్పారు. ‘కూలీ’ చిత్రం తర్వాత లోకేశ్ కనగరాజ్ దర్శకత్వంలో రజనీకాంత్, కమల్‌హాసన్ కాంబోలో ఓ సినిమా రాబోతోందంటూ ఇటీవల ఊహాగానాలు వినిపించాయి. ఈ కాంబోపై ఇప్పుడు స్పష్టత వచ్చింది. ఈ మేరకు బుధవారం అధికారిక ప్రకటన వెలువడింది.

కమల్‌హాసన్ సొంత ప్రొడక్షన్ హౌజ్ రాజ్ కమల్ ఫిల్మ్స్ ఇంటర్నేషనల్ బ్యానర్‌లో రజనీకాంత్ తన కెరీర్‌లోని 173వ చిత్రాన్ని చేయబోతున్నట్టు మేకర్స్ ప్రకటించారు. దర్శకుడు సుందర్ సీ ఈ చిత్రాన్ని తెరకెక్కించనున్నారు. ఈ బ్యానర్ స్థాపించి 44 ఏళ్లు కావడంతో ఇలాంటి ప్రతిష్టాత్మక చిత్రాన్ని రూపొందిస్తున్నందుకు సంతోషం వ్యక్తం చేస్తున్నట్టు నిర్మాతలు వెల్లడించారు. ఈ చిత్రాన్ని 2027 సంక్రాంతి కానుకగా విడుదల చేయనున్నారు.