13 July, 2026 | 9:38 PM 
కరసామి భార్య..పేరు.. సెల్లి
ధనుష్ హీరోగా నటిస్తున్న తాజాచిత్రం ‘కర’. విఘ్నేశ్ రాజా దర్శకత్వంలో తెరకెక్కుతున్న ఈ సినిమాను వెల్స్ ఫిల్మ్ ఇంటర్నేషనల్ పతాకంపై కే గణేశ్ నిర్మిస్తున్నారు. శక్తిమంతమైన ప్రతినాయకులతో పోరాడేందుకు హింసా మార్గాన్ని ఎంచుకునే పత్తి రైతు ‘కరసామి’ పాత్రలో ధనుష్ నటిస్తుండగా, ఆయన సరసన మలయాళ బ్యూటీ మమిత బైజు కథానాయికగా నటిస్తోంది.
ఈ సినిమా నుంచి ఇప్పటికే విడుదలైన పోస్టర్లు ప్రేక్షకుల్లో ఆసక్తిని రేకెత్తించాయి. తాజాగా చిత్ర యూనిట్ కథానాయకి మమిత బైజు ఫస్ట్లుక్ను విడుదల చేసింది. ఈ పోస్టర్లో మమిత ఎప్పుడూ లేనివిధంగా చాలా డీ-గ్లామరస్ లుక్లో కనిపిస్తోంది. ఎలాంటి మేకప్ లేకుండా, మెరూన్ కలర్ చీరలో, ఒక పాత ఇంట్లో బాధగా కూర్చుని ఉన్న ఆమె లుక్ ఆశ్చర్యపరుస్తోంది. ఇందులో ఆమె ధనుష్ భార్యగా ‘సెల్లి’ అనే పాత్రలో నటిస్తున్నట్టు మేకర్స్ ప్రకటించారు.
పెళ్లయిన మహిళగా మమిత నటన ఈ సినిమాకు హైలైట్ కానుందని సమాచారం. ఈ చిత్రంలో కేఎస్ రవికుమార్, కరుణాస్ జయరామ్, పృథ్వీ పాండియారాజన్, సూరజ్ వెంజరమూడు వంటి దిగ్గజ నటులు కీలక పాత్రలు పోషిస్తున్నారు. ప్రస్తుతం షూటింగ్ శరవేగంగా జరుపుకొంటున్న ఈ సినిమా ఏప్రిల్ 30న థియేటర్ల ద్వారా ప్రేక్షకుల ముందుకు రానుంది.
