బెంగళూరు: కర్ణాటక ముఖ్యమంత్రి సిద్ధరామయ్య(Karnataka CM Siddaramaiah) ఈరోజు రాష్ట్రంలో 16 సంవత్సరాల కంటే తక్కువ వయస్సు ఉన్న పిల్లలు సోషల్ మీడియా(Social Media Ban) వాడకాన్ని నిషేధించాలని ప్రతిపాదించారు. ముఖ్యమంత్రి తన 17వ బడ్జెట్‌ను సమర్పించిన సందర్భంగా ఈ ప్రకటన చేశారు. "పిల్లలపై పెరుగుతున్న మొబైల్ వాడకం వల్ల కలిగే ప్రతికూల ప్రభావాలను నివారించే లక్ష్యంతో, 16 సంవత్సరాల కంటే తక్కువ వయస్సు ఉన్న పిల్లలు సోషల్ మీడియా వాడకాన్ని నిషేధించనున్నారు" అని సిద్ధరామయ్య అన్నారు. బెంగళూరులో రోబోటిక్స్ అండ్ ఏఐ ఇన్నోవేషన్ జోన్(Robotics and AI Innovation Zone) ఏర్పాటు చేస్తున్నామని సిద్ధరామయ్య వెల్లడించారు. ఇస్రో సహకారంతో ఐఐఎస్ సీ ఆధ్వరంలో రోబోటిక్స్ అండ్ ఏఐ ఇన్నోవేషన్ జోన్ ఏర్పాటు చేస్తామని పేర్కొన్నారు.

టీనేజర్లు మొబైల్ స్క్రీన్ ఎక్కువగా సేపు చూడటం, చదువుపై దృష్టి తగ్గడం, ప్రవర్తనా మార్పులు, మానసిక ఆరోగ్య సవాళ్ల గురించి పెరుగుతున్న ఆందోళనల మధ్య ఈ నిర్ణయం తీసుకున్నామని సిద్ధరామయ్య పేర్కొన్నారు. స్మార్ట్‌ఫోన్‌లకు అపరిమిత ప్రాప్యత సోషల్ మీడియా(Social Media) వ్యామోహానికి, పిల్లలను హానికరమైన కంటెంట్‌కు అలవాటు పడుతున్నారని, కొన్ని సందర్భాల్లో మాదకద్రవ్య దుర్వినియోగ నెట్‌వర్క్‌లకు దోహదపడిందని ప్రభుత్వం విశ్వసిస్తోందన్నారు. ఆదివారం ప్రభుత్వ విశ్వవిద్యాలయాల వైస్ ఛాన్సలర్లతో జరిగిన చర్చలో ముఖ్యమంత్రి సిద్ధరామయ్య(Siddaramaiah) ఈ అంశాన్ని లేవనెత్తారు. అటువంటి చర్యలు, చిక్కులపై వారి అభిప్రాయాలను కోరారు. కర్ణాటక రాష్ట్ర బడ్జెట్ రూ.4,48,004 కోట్లుగా నిర్ణయించబడింది. సాంకేతికత ఆధారిత వృద్ధి, మౌలిక సదుపాయాల అభివృద్ధి, పర్యావరణ స్థిరత్వంపై కర్నాటక ప్రభుత్వం దృష్టి సారించింది. 

బడ్జెట్‌ను సమర్పిస్తూ సిద్ధరామయ్య మాట్లాడుతూ, జాతీయ, అంతర్జాతీయ వాణిజ్యంలో(International trade) కర్ణాటక విశిష్ట పాత్ర పోషిస్తుందని, ఆర్టిఫిషియల్ ఇంటెలిజెన్స్ (AI)లో వేగవంతమైన పరిణామాలు ప్రపంచ ఉత్పత్తి వ్యవస్థలను మారుస్తున్నాయని అన్నారు. శాస్త్ర సాంకేతిక రంగంలో ఆవిష్కరణలు రాష్ట్ర గమనాన్ని మరింతగా రూపొందిస్తున్నాయని స్పష్టం చేశారు. "అగ్నిని వెలుగుగా మార్చే" సంకల్పంతో ముందుకు సాగడానికి బాధ్యత, దూరదృష్టితో బడ్జెట్‌ను సమర్పించామని కర్ణాటక ముఖ్యమంత్రి పేర్కొన్నారు.