యష్ హీరోగా గీతూ మోహన్ దాస్ తెరకెక్కిస్తున్న చిత్రం ‘టాక్సిక్: ఎ ఫెయిరీటేల్ ఫర్ గ్రోన్-అప్స్’. కేవీఎన్ ప్రొడక్షన్స్, మాన్‌స్టర్ మైండ్ క్రియేషన్స్ పతాకంపై వెంకట్ కే నారాయణ, యశ్ సంయుక్తంగా నిర్మిస్తున్నారు. హాలీవుడ్ స్థాయికి ధీటుగా తెరకెక్కుతున్న ఈ సినిమా మీద ఇప్పటికే భారీ అంచనాలు నెలకొన్నాయి. అయితే ఈ సినిమా రిలీజ్ వాయిదా పడనుందంటూ పుకార్లు వచ్చిన నేపథ్యంలో నిర్మాతలు ఆ రూమర్స్‌కి చెక్ పెట్టారు. ఇంతకుముందు ప్రకటించిన రిలీజ్ డేట్‌లో ఎలాంటి మార్పు లేదని.. 2026, మార్చి 19కే విడుదలవుతుందని మరోమారు స్పష్టం చేశారు. ‘ఏప్రిల్ నెల నుంచి పోస్ట్ ప్రొడక్షన్‌లో భాగంగా వీఎఫ్‌ఎక్స్ పనులు ప్రారంభమయ్యాయి. మరోవైపు యష్ ముంబైలో ‘రామాయణ’ సినిమా షూటింగ్‌ను ప్రారంభించారు. కాబట్టి టాక్సిక్ సినిమా ప్రమోషనల్ వర్క్ వచ్చే జనవరి నుంచి ప్రారంభమవుతుందని ఈ సందర్భంగా మేకర్స్ తెలియజేశారు.

కేజీఎఫ్ వంటి సెన్సేషనల్ బ్లాక్ బస్టర్ తర్వాత యష్ నటిస్తున్న ఈ సినిమా ఇంగ్లీష్, కన్నడలో తెరకెక్కుతోంది. దీన్ని హిందీ, తెలుగు, తమిళ, మలయాళ భాషల్లో రిలీజ్ చేస్తున్నారు. మెయిన్ ఫెస్టివల్స్ సీజన్ సందర్భంగా ‘టాక్సిక్: ఎ ఫెయిరీటేల్ ఫర్ గ్రోన్-అప్స్’  రిలీజ్ కానుంది. గుడి పడ్వా, ఉగాది సహా ప్రాంతీయ నూతన సంవత్సర వేడుకలు ఒకేసారి వస్తున్నాయి. వీటితోపాటు రంజాన్ పండుగ ఉండటం వల్ల ఈ రోజుల్లో బాక్సాఫీస్ దగ్గర సినిమా భారీ ప్రభావం చూపనుంది.