మహిళ, ముగ్గురు పిల్లలు మృతి, భర్తపై అనుమానం

న్యూఢిల్లీ: ఢిల్లీలోని సమయ్‌పూర్ బద్లి ప్రాంతంలో బుధవారం ఒక మహిళ, ఆమె ముగ్గురు మైనర్ పిల్లలు పదునైన ఆయుధంతో హత్యకు గురయ్యారు. ఈ హత్యలో ఆమె భర్త పాత్ర ఉందని పోలీసులు అనుమానిస్తున్నారు. ఈ సంఘటన చందన్ పార్క్ ప్రాంతంలో(Chandan Park area) చోటుచేసుకుంది. అక్కడ మహిళ, ఆమె ముగ్గురు పిల్లల మృతదేహాలు వారి నివాసంలో దొరికాయని పోలీసులు తెలిపారు. 

ప్రాథమిక సమాచారం ప్రకారం, ఆ మహిళ భర్త తన భార్య, ముగ్గురు పిల్లలను గొంతు కోసి హత్య చేసి అక్కడి నుండి పారిపోయాడని ఆరోపణలున్నాయి. క్రైమ్ టీం, ఫోరెన్సిక్ నిపుణులు సంఘటనా స్థలానికి చేరుకున్నారని ఒక సీనియర్ పోలీసు అధికారి తెలిపారు. ఈ ఘటనపై కేసు నమోదు చేసుకున్న పోలీసులు మరణానికి ఖచ్చితమైన కారణాన్ని తెలుసుకోవడానికి మృతదేహాలను పోస్ట్‌మార్టం పరీక్ష కోసం పంపారు. ఈ విషయం దర్యాప్తులో ఉందని, నిందితులను పట్టుకోవడానికి బహుళ బృందాలను ఏర్పాటు చేశామని పోలీసులు పేర్కొన్నారు.