రోడ్డు ప్రమాదంలో తల్లి కోతి మృతి.. ఒడిని వీడని పసికోతి.. కంటతడి పెట్టించిన ఘటన

తంగళ్ళపల్లి జూలై 2 (విజయక్రాంతి): రాజన్న సిరిసిల్ల జిల్లా తంగళ్లపల్లి మండలం గండిలచ్చపేట గ్రామ బస్టాండ్ వద్ద జరిగిన రోడ్డు ప్రమాదంలో ఓ తల్లి కోతి మృతి చెందింది. అయితే తల్లి చనిపోయిందనే విషయం తెలియని పసి కోతి ఆమె శరీరాన్ని గట్టిగా హత్తుకుని, ఒడిలోనే నిద్రపోయిన దృశ్యం అక్కడున్న వారిని కంటతడి పెట్టించింది.

తల్లి ఒడిలోనే తనకు రక్షణ ఉందనే అమాయక నమ్మకంతో ఉన్న ఆ చిన్నారి కోతి దృశ్యం ప్రతి ఒక్కరి హృదయాన్ని కదిలించింది. తల్లి ప్రేమకు హద్దులు లేవని, అది మనుషులకే కాదు మూగజీవాల్లోనూ అంతే గొప్పదని ఈ ఘటన మరోసారి గుర్తు చేసింది. ఈ హృదయ విదారక దృశ్యాలను చూసిన స్థానికులు భావోద్వేగానికి లోనవగా, ప్రస్తుతం ఈ వీడియో సోషల్ మీడియాలో వైరల్‌గా మారి వేలాది మంది నెటిజన్లను కంటతడి పెట్టిస్తోంది. తల్లి–బిడ్డల అనుబంధానికి ఈ ఘటన ఓ మౌన సాక్ష్యంగా నిలిచింది.