యూపీఐ సేవలకు కొత్తరూపు

1. పార్లమెంట్‌లో పన్నులు, ఇతర చట్టాల సవరణ బిల్లు
2. కోటిన్నర టర్నోవర్ వ్యాపారులకు ఎండీఆర్ వడ్డన
3. ప్రతి రూ.౨ వేల పేమెంట్‌కు ౦.౪ శాతం వరకు పన్ను
4. సాధారణ పౌరులు, చిన్న వ్యాపారులకు మినహాయింపు

న్యూఢిల్లీ, ఆగస్టు ౭: డిజిటల్ చెల్లింపుల (యూపీఐ) రంగాన్ని స్వావలంబన దిశగా నడిపించేందుకు కేంద్ర ప్రభుత్వం సంచలన నిర్ణయం తీసుకుంది. పెద్దఎత్తున వ్యాపారం నిర్వహించే సంస్థలు, యాజమాన్యాలకు సంబంధించిన లావాదేవీలపై అదనపు పన్ను వసూలు చేసేందుకు సిద్ధమైంది. దీనిలో భాగంగానే తాజాగా పార్లమెంట్‌లో ‘పన్నులు, ఇతర చట్టాల సవరణ బిల్లు ౨౦౨౬’ బిల్లును ప్రవేశపెట్టింది. బిల్లు ద్వారా నిర్దిష్ట పరిమితి దాటిన వ్యాపారాలపై ఛార్జీలు విధించే పూర్తి అధికారాలు కేంద్ర ప్రభుత్వానికి దక్కాయి.

అయితే..ఈ చట్టం వల్ల సగటు పౌరుడిపై ఎలాంటి అదనపు భారం పడదని కేంద్ర ప్రభుత్వం స్పష్టం చేసింది. వ్యక్తిగత లావాదేవీలు, చిన్న తరహా వ్యాపారులకు చట్టం నుంచి మినహాయింపు ఉంటుంది. కొత్త బిల్లు ద్వారా సాంకేతిక మౌలిక వసతుల కల్పన, భద్రత పెంపు కోసం బ్యాంకులు, ఫిన్‌టెక్ సంస్థలు మర్చంట్ డిస్కౌంట్ రేటు (ఎండీఆర్)ను పొందేందుకు మార్గం సుగమం అవుతుంది. అలాగే, సంవత్సరానికి కోటిన్నర వార్షిక టర్నోవర్ ఉండే వ్యాపారులపై ఈ ఎండీఆర్ భారం పడనుంది.

రూ.౨ వేలకు పైగా జరిపే ప్రతి లావాదేవీపై వ్యాపారి ౦.౪ శాతం వరకు పన్ను చెల్లించాల్సి ఉంటుంది. సదరు వ్యాపారి డిజిటల్ నెట్‌వర్క్ సేవలు వినియోగించుకున్నందుకు చెల్లించే పన్నే ఈ ఎండీఆర్ అన్నమాట. దేశ ఆర్థిక వ్యవస్థలో 95 శాతానికి పైగా చెల్లింపులు చిన్న మొత్తాలే కాబట్టి, ప్రజలు ఆందోళన చెందాల్సిన అవసరం లేదని కేంద్రప్రభుత్వం తెలిపింది. అయితే.. ఈ నిర్ణయంపై వినియోగదారుల్లో అనేక అనుమానాలు నెలకొన్నాయి. వ్యాపారులు తమపై పడే ఎండీఆర్ భారాన్ని సర్దుబాటు చేసేందుకు వస్తువుల ధరలను పెంచే అవకాశం ఉందనే చర్చ సాగుతున్నది. బ్యాంకులు, పేమెంట్ సంస్థల ఆదాయం పెరిగితేనే ఈ సేవలు సురక్షితంగా, నిరంతరాయంగా కొనసాగుతాయని కేంద్రం భావిస్తున్నది.

బిల్లు వెనుక ఉద్దేశం

కేంద్ర ప్రభుత్వం ఈ బిల్లు తీసుకురావడం వెనుక దేశీయ ఫిన్‌టెక్ రంగంలో నెలకొన్న ఆర్థికపరమైన ఒత్తిళ్లే కారణమని మార్కెట్ నిపుణులు అంచనా వేస్తున్నారు. ‘సున్నా’ (జీరో) ఎండీఆర్ విధానంతో నాలుగేళ్లుగా నేషనల్ పేమెంట్స్ కార్పొరేషన్ ఆఫ్ ఇండియా సహా పేటీఎం, ఫోన్‌పే, రేజర్‌పే వంటి ఫిన్‌టెక్ సంస్థలు, వాణిజ్య బ్యాంకులు నెట్‌వర్క్ నిర్వహణ, సాంకేతిక భద్రత, మోసాల అరికట్టడం కోసం వేల కోట్ల రూపాయల భారాన్ని మోయాల్సి వచ్చింది.

కేంద్ర ప్రభుత్వం యేటా ఇస్తున్న కొంత మొత్తం రాయితీ ఈ భారీ నెట్‌వర్క్ నిర్వహణ వ్యయానికి ఏమాత్రం సరిపోవడం లేదని పేమెంట్స్ కౌన్సిల్ ఆఫ్ ఇండియా కూడా భావిస్తున్నది. ఇప్పుడు సేకరించే ఎండీఆర్ నిధుల వల్ల డిజిటల్ నెట్‌వర్క్‌ను గ్రామీణ ప్రాంతాలకు మరింత విస్తరించేందుకు, సైబర్ దాడుల నుంచి చెల్లింపుల వ్యవస్థను రక్షించేందుకు, వినూత్నమైన డిజిటల్ ఉత్పత్తులను అందుబాటులోకి తేవడానికి బ్యాంకింగ్ రంగానికి స్పష్టమైన ఆదాయ మార్గం దొరుకుతుంది. కేంద్రం తీసుకున్న ఈ చట్టపరమైన ఊరటతో షేర్ మార్కెట్‌లో ప్రధాన ఫిన్‌టెక్ కంపెనీల స్టాక్స్ పుంజుకోవడం ఈ మార్పునకు పరిశ్రమ నుంచి లభిస్తున్న సానుకూల స్పందనకు అద్దం పడుతున్నది.