బీజేపీ నేతలు..

చిగురుమామిడి (విజయక్రాంతి): గ్రామ పంచాయతీ ఎన్నికలను రాష్ట్ర ప్రభుత్వం కేంద్ర నిధుల కోసం మాత్రమే నిర్వహిస్తోందని బీజేపీ రాష్ట్ర కార్యవర్గ సభ్యులు బాస సత్యనారాయణ, కోమటిరెడ్డి రాంగోపాల్ రెడ్డి ఆరోపించారు. బీజేపీ మండల అధ్యక్షుడు పోలోజు సంతోష్ కుమార్ ఆధ్వర్యంలో శనివారం నిర్వహించిన మీడియా సమావేశంలో వారు మాట్లాడారు. గ్రామాల అభివృద్ధి కేంద్రంలోని మోదీ ప్రభుత్వంతోనే సాధ్యమవుతుందని సత్యనారాయణ అన్నారు. రోడ్లు, వీధిలైట్లు, అంగన్వాడీలు, నరేగా పనులు, ఉజ్వల గ్యాస్, రేషన్ వంటి పథకాలకు కేంద్రం భారీగా నిధులు అందిస్తున్నదని తెలిపారు.

బండి సంజయ్ ఎంపీ ల్యాడ్స్ నిధులతో అనేక అభివృద్ధి కార్యక్రమాలు జరిగాయని పేర్కొన్నారు. రెండేళ్లుగా కాంగ్రెస్ ప్రభుత్వం గ్రామాల కోసం ఏ కార్యక్రమానికీ నిధులు కేటాయించలేదని విమర్శించారు. గ్రామాభివృద్ధి కోసం బీజేపీ సర్పంచ్ అభ్యర్థులను విజయం సాధించేందుకు ప్రజలు సహకరించాలని పిలుపునిచ్చారు. సమావేశంలో పలువురు బీజేపీ నేతలు పాల్గొన్నారు.