పెట్రోల్, డీజిల్ నో స్టాక్

ఇబ్బందుల్లో వాహనదారులు బ్లాక్ లో అమ్మకాల జోరు 

కేసముద్రం, ఏప్రిల్ 24 (విజయక్రాంతి): కేసముద్రం పట్టణ పరిధిలోని మూడు పెట్రోల్ పంపులు, కల్వల పరిధిలోని ఒక పెట్రోల్ పంపులో శుక్రవారం డీజిల్, పెట్రోల్ నో స్టాక్ బోర్డు పెట్టారు. దీనితో వాహనదారులు పెట్రోల్, డీజిల్ కోసం తీవ్ర ఇబ్బందులు పడాల్సి వచ్చింది. హెచ్ పీ, భారత్, ఇండియన్ ఆయిల్ పెట్రోల్ పంపులు డీజిల్, పెట్రోల్ స్టాక్ అయిపోయిందని బోర్డు పెట్టారు. ఉదయం నుండి సాయంత్రం వరకు వాహనదారులు పెట్రోల్, డీజిల్ కోసం ఇతర ప్రాంతాలకు వెళ్లాల్సి వచ్చింది.

అయితే సందట్లో సడే మియా అన్నచందంగా కొందరు ముందుగానే అక్రమంగా పెట్రోల్, డీజిల్ స్టాక్ చేసి అధిక ధరలకు విక్రయించి వాహనదారుల జేబులకు చిల్లులు పెట్టినట్లు ఆవేదన వ్యక్తం చేశారు. పెట్రోలియం సంస్థలు రిటైలర్ పెట్రోల్ పంపు లకు డిమాండ్ కు తగ్గట్టు పెట్రోల్, డీజిల్ సరఫరా చేయకపోవడం వల్లే కొరతకు కారణమైందని పలు పెట్రోల్ పంపులు యజమానులు పేర్కొన్నారు.

కేసముద్రం మున్సిపాలిటీ పరిధిలోని పెట్రోల్ పంపుల్లో ఒక్కసారిగా స్టాక్ లేకపోవడం వల్ల ఇబ్బంది తలెత్తింది. అధికారులు స్పందించి డీజిల్ పెట్రోల్ కొరత లేకుండా చర్యలు తీసుకోవాలని, బ్లాక్ మార్కెట్ లేకుండా చర్యలు తీసుకోవాలని డిమాండ్ చేశారు.