న్యూఢిల్లీ: ప్రధానమంత్రి నరేంద్ర మోదీ గురువారం నాడు న్యూఢిల్లీలోని తన అధికారిక నివాసంలో నేషనల్ డెమోక్రటిక్ అలయన్స్ (National Democratic Alliance)కి చెందిన పార్లమెంటు సభ్యులందరికీ ప్రత్యేక విందు ఇవ్వనున్నారు. గత పార్లమెంటు సమావేశాల సమయంలోనే ఈ విందును ఏర్పాటు చేయాలని ముందుగా ప్రణాళిక వేసినప్పటికీ, బీహార్ అసెంబ్లీ ఎన్నికలలో కూటమి సాధించిన చారిత్రాత్మక విజయం తర్వాత జరుగుతున్న ముఖ్యమైన సమావేశాలలో ఇది ఒకటి. ఎన్‌డిఎకు చెందిన పార్లమెంటు సభ్యులందరూ ఈ సమావేశానికి హాజరవుతారని భావిస్తున్నారు. సీనియర్ కేంద్ర మంత్రులకు వారి ప్రాంతాల ఎంపీలతో సమన్వయం చేసుకునే బాధ్యతను అప్పగించారు. కేంద్ర మంత్రి ధర్మేంద్ర ప్రధాన్, బీజేపీ ఎంపీ సుకాంత మజుందార్ ఒడిశా, పశ్చిమ బెంగాల్ రాష్ట్రాల ఎంపీల కోసం ఏర్పాట్లను పర్యవేక్షిస్తుండగా, ఈశాన్య రాష్ట్రాల ఎంపీలతో సమన్వయం బాధ్యతను కేంద్ర మంత్రి కిరణ్ రిజిజుకు అప్పగించారు. పంజాబ్‌లో వరదల కారణంగా ప్రత్యేక విందు కార్యక్రమం ఇంతకు ముందు వాయిదా పడింది.

ప్రధాని మోదీ ప్రత్యేక విందు 

విందు కోసం దాదాపు 54 టేబుల్స్ ఏర్పాటు చేశారు. ప్రతి  టేబుల్ వద్ద బీజేపీ ఎంపీలతో పాటు వివిధ కూటమి భాగస్వామ్య పక్షాలకు చెందిన ఎనిమిది మంది ఎంపీలు కూర్చుంటారు. ప్రతి టేబుల్ వద్ద ఒక కేంద్ర మంత్రి కూడా కూర్చుంటారు. విందు సమయంలో ప్రధానమంత్రి ప్రతి టేబుల్ వద్ద కూర్చున్న ఎంపీలతో ముచ్చటిస్తూ సమయం గడుపుతారని ఏన్డీయే వర్గాలు తెలిపాయి. ప్రతిపాదిత విందును కూటమి భాగస్వాముల మధ్య స్వేచ్ఛాయుతమైన, నిర్మాణాత్మక చర్చలకు వేదికగా ప్రణాళిక చేశారు. ఈ విందు ప్రధానమంత్రికి శాసనపరమైన ప్రాధాన్యతలపై చర్చించడానికి, పార్లమెంట్ ప్రస్తుత సమావేశానికి సంబంధించి ప్రభుత్వం విస్తృత అజెండాను అంచనా వేయడానికి, ఎన్‌డిఎ సామూహిక రాజకీయ దిశను బలోపేతం చేయడానికి ఒక అవకాశాన్ని కల్పిస్తుందని వర్గాలు తెలిపాయి. ఈ విందు సమావేశంలో కీలక చర్చలు జరగనున్నాయి. ప్రధాని మోదీ నేతలకు దిశానిర్దేశాలు చేయనున్నారు. పశ్చిమ బెంగాల్, తమిళనాడు, అస్సాంలో జరగబోయే అసెంబ్లీ ఎన్నికల కోసం ప్రాథమిక వ్యూహాలపై చర్చలు ఇప్పటికే ప్రారంభమయ్యాయి.