దోమకొండ,(విజయక్రాంతి): దోమకొండ మండలం అంబారిపేట్ గ్రామంలో శ్రీ ఎల్లమ్మ జమదగ్ని మునిరాజుల కళ్యాణ మహోత్సవం భక్తిశ్రద్ధలతో ఘనంగా నిర్వహించారు. వేదమంత్రోచ్ఛారణల మధ్య జరిగిన కళ్యాణ వేడుకలు భక్తులకు ఆధ్యాత్మిక ఆనందాన్ని పంచాయి. ఆలయ ప్రాంగణం భక్తులతో కిటకిటలాడగా, ఉత్సవ వాతావరణం నెలకొంది.

ఈ సందర్భంగా గ్రామ సర్పంచ్ అరుట్ల కవిత–అనిల్ అమ్మవారికి పట్టు వస్త్రాలు, పుస్తె మట్టెలు సమర్పించి ప్రత్యేక పూజలు నిర్వహించారు. ఉపసర్పంచ్ సత్యగౌడ్‌తో పాటు గౌడ కులస్తులు, గ్రామస్తులు పెద్ద సంఖ్యలో పాల్గొని మొక్కులు తీర్చుకున్నారు. అనంతరం భక్తులకు అన్నదాన కార్యక్రమం నిర్వహించి సేవాభావాన్ని చాటుకున్నారు. ఈ వేడుకలు గ్రామ ఐక్యతను, భక్తి భావాన్ని మరింత బలపరిచాయని పెద్దలు తెలిపారు.