బెంగాల్‌లో రీపోలింగ్: తొలి 2 గంటల్లో 16.23 శాతం ఓటింగ్

కోల్‌కతా: పశ్చిమ బెంగాల్‌లోని దక్షిణ 24 పరగణాల జిల్లాలో గల రెండు అసెంబ్లీ నియోజకవర్గాల పరిధిలోని 15 పోలింగ్ కేంద్రాల్లో జరిగిన రీపోలింగ్‌లో ఓటింగ్ ప్రారంభమైన తొలి రెండు గంటల్లోనే 16 శాతానికి పైగా పోలింగ్ నమోదైనట్లు ఎన్నికల సంఘం ప్రకటించింది. మగ్రాహత్ పశ్చిమ్ అసెంబ్లీ నియోజకవర్గంలోని 11 పోలింగ్ కేంద్రాలలో, ఎన్నికల అవకతవకలు జరిగినట్లు వచ్చిన నివేదికల నేపథ్యంలో ఒక రోజు క్రితం తిరిగి పోలింగ్ నిర్వహించాలని ఈసీ ఆదేశించిన డైమండ్ హార్బర్‌లోని నాలుగు పోలింగ్ కేంద్రాలలో ఓటింగ్ ప్రశాంతంగా కొనసాగుతోంది. ఉదయం 7 గంటలకు ప్రారంభమైన పోలింగ్ సాయంత్రం 6 గంటల వరకు కొనసాగుతుందని అధికారులు తెలిపారు. బెంగాల్‌ రీపోలింగ్‌లో ఉదయం 9 గంటల వరకు సుమారు 16.23 శాతం పోలింగ్ నమోదైనట్లు పేర్కొన్నారు.