సెల్వమణి సెల్వరాజ్ దర్శకత్వంలో రానా దగ్గుబాటితో కలిసి దుల్కర్ సల్మాన్ హీరోగా నటిస్తూ నిర్మిస్తున్న చిత్రం ‘కాంత’. తమిళ చిత్రపరిశ్రమ తొలి సూపర్ స్టార్ ఎంకే త్యాగరాజ భాగవతార్ జీవితం ఆధారంగా ఈ సినిమా రూపొందింది. ఇందులో తమ తాత త్యాగరాజ భాగవతార్‌ను తప్పుగా చూపించారంటూ ఆయన మనవడు, తమిళనాడు ప్రభుత్వ రిటైర్డ్ జాయింట్ సెక్రటరీ త్యాగరాజన్ ఆరోపించారు. ఈ సినిమా విడుదల కాకుండా ఆదేశాలివ్వాలంటూ 64 ఏళ్ల వయస్కుడైన త్యాగరాజన్ చెన్నై సిటీ సివిల్ కోర్టులో పిటిషన్ దాఖలు చేశారు.

భాగవతార్ అనైతికంగా జీవించారని, కంటిచూపు కోల్పోయారని, చివరి రోజుల్లో పేదరికంలో చిక్కుకొని అప్పుల్లో మరణించినట్టు సినిమాలో చిత్రీకరించారని ఆరోపించారు. కానీ, తన తాత వద్ద ఖరీదైన కార్లు, సొంత బంగ్లా ఉన్నాయని తెలిపారు. ఆయనకు ఎలాంటి చెడు అలవాట్లు లేవని పేర్కొన్నారు. పిటిషనర్ అభ్యర్థనను పరిశీలించిన కోర్టు.. నవంబర్ 18వ తేదీలోగా జవాబు ఇవ్వాలంటూ చిత్ర నిర్మాణ సంస్థలు, నటుడు దుల్కర్ సల్మాన్‌కు నోటీసులు జారీ చేసింది.