* బస్సులో పోగొట్టుకున్న సెల్ ఫోన్ అప్పగింత

హుస్నాబాద్: ఆర్టీసీ బస్సులో పోగొట్టుకున్న విలువైన సెల్ ఫోన్‌ను అందజేసి, సిద్దిపేట జిల్లా హుస్నాబాద్ ఆర్టీసీ సిబ్బంది తమ నిజాయితీని చాటుకున్నారు. కోహెడ మండలం సముద్రాలకు చెందిన బూర భాగ్యలక్ష్మి సిద్దిపేట నుంచి సముద్రాలకు బస్సులో వచ్చి, హడావుడిగా దిగి ఇంటికి వెళ్లింది. ఇంటికి రాగానే తన సెల్ ఫోన్‌ను బస్సులోనే మరిచిపోయినట్టు తెలుసుకుంది. వెంటనే హుస్నాబాద్ బస్టాండ్‌లోని సెక్యూరిటీ కానిస్టేబుల్ వెంకటేశ్ కు సమాచారం అందించింది.

* తక్షణమే స్పందించిన సిబ్బంది

బాధితురాలు అందించిన సమాచారం మేరకు, సెక్యూరిటీ కానిస్టేబుల్ తక్షణమే స్పందించారు. ఆ ఫోన్ పోయిన సిద్దిపేట డిపోకు చెందిన పల్లె వెలుగు బస్సు ఆన్ డ్యూటీ కండక్టర్ అనురాధకు కాల్ చేసి, ఫోన్ గురించి అలర్ట్ చేశారు. ఆ బస్సు అప్పటికే హనుమకొండ వైపు వెళుతోంది. కండక్టర్ తనిఖీ చేయగా, ఫోన్ బస్సులోనే దొరికింది. తిరిగి ఆ బస్సు హనుమకొండ నుంచి సిద్దిపేట వైపు వస్తున్న దశలో,  హుస్నాబాద్ బస్టాండ్‌కు రాగా కండక్టర్ ఫోన్ ను ఎస్ టీఐకి అప్పగించారు. అప్పటికే అక్కడ ఉన్న బాధితురాలు బూర భాగ్యలక్ష్మికి ఆమె సెల్ ఫోన్‌ను అప్పగించారు. ఆర్టీసీ సిబ్బంది ప్రదర్శించిన ఈ నిజాయితీ, సంస్థ పట్ల ప్రజల్లో మరింత నమ్మకాన్ని పెంచింది.