హుస్నాబాద్: సిద్దిపేట జిల్లా అక్కన్నపేట మండలం శ్రీరాంతండా సర్పంచిగా బానోత్ వెంకటేశ్ ను ఏకగ్రీవంగా ఎన్నుకున్నారు. గతంలో కనీస మౌలిక సదుపాయాలు కూడా లేక, అభివృద్ధికి నోచుకోని తండా, ఈసారి ఎన్నికల ద్వారా కొత్త అధ్యాయాన్ని ప్రారంభించాలని నిర్ణయించుకుంది. నూతనంగా గ్రామ పంచాయతీగా ఏర్పడిన శ్రీరాంతండా, గత ఐదేండ్లుగా నిరాదరణకు గురైంది. కనీసం వీధి దీపాలు, మంచినీటి వంటి మౌలిక సదుపాయాలు కూడా లేవు. దీంతో ఈసారి ఎన్నికల ద్వారా తండాను అభివృద్ధి చేసుకోవాలని తండావాసులు కలిసికట్టుగా నిర్ణయించుకున్నారు.

గ్రామ అభివృద్ధిని దృష్టిలో ఉంచుకొని, ఎన్నికల పోటీ లేకుండా అన్ని పదవులను ఏకగ్రీవంగా ఎన్నుకోవాలని నిర్ణయం తీసుకున్నారు.  చదువుకున్న యువకుడు బానోతు వెంకటేశ్ ను సర్పంచిగా ఎన్నుకున్నారు. సర్పంచితోపాటు 8 మందిని వార్డు సభ్యులను కూడా ఏకగ్రీవంగా ఎన్నుకున్నారు. "గ్రామాన్ని అభివృద్ధి చేసుకోవాలనే ఏకైక లక్ష్యంతో అందరం కలిసి ఈ నిర్ణయం తీసుకున్నాం. పోటీల వల్ల మనస్పర్థలు, డబ్బు ఖర్చు తప్ప, అభివృద్ధి జరగదు. అందుకే ఈసారి చదువుకున్న యువకుడిని ఏకగ్రీవంగా ఎన్నుకున్నాం." అని తండావాసులు అన్నారు.

* సంబరాల్లో మునిగిన తండా

ఏకగ్రీవ ఎన్నిక నిర్ణయాన్ని ప్రకటించిన అనంతరం తండావాసులు ఆనందోత్సాహాల్లో మునిగిపోయారు. కొత్త సర్పంచి, వార్డు సభ్యులను ఎన్నుకొని, ఒకరిపై ఒకరు రంగులు చల్లుకుంటూ సంబరాలు జరుపుకున్నారు. ఏకగ్రీవంగా ఎన్నుకోబడిన సర్పంచి, వార్డుసభ్యులు తండాను అభివృద్ధి పథంలో నడిపిస్తారని తండావాసులు గట్టి నమ్మకంతో ఉన్నారు.