ఫ్యాక్టరీలో అగ్నిప్రమాదం: ఏడుగురు సజీవదహనం

జైపూర్: రాజస్థాన్‌లోని భివాడి పట్టణంలోని ఒక రసాయన కర్మాగారంలో(Chemical Factory Fire) సోమవారం జరిగిన అగ్నిప్రమాదంలో ఏడుగురు కార్మికులు సజీవ దహనం అయ్యారని అధికారులు తెలిపారు. ఇద్దరు కార్మికులు యూనిట్ లోపల చిక్కుకున్నట్లు తెలుస్తోంది. భివాడిలోని ఖుష్ఖేరా-కరోలి పారిశ్రామిక ప్రాంతంలో మంటలు చెలరేగాయి. అదనపు జిల్లా మేజిస్ట్రేట్ సుమితా మిశ్రా మాట్లాడుతూ, పోలీసులు సాధారణ గస్తీ సమయంలో ఈ సంఘటన గురించి తెలుసుకున్నారని, వెంటనే సహాయక చర్యలు ప్రారంభించామని చెప్పారు. "తొమ్మిది మంది లోపల చిక్కుకున్నారు. ఇప్పటివరకు ఏడుగురి మృతదేహాలను బయటకు తీశారు" అని ఆమె చెప్పారు. మిగిలిన ఇద్దరిని రక్షించడానికి ప్రయత్నాలు జరుగుతున్నాయని తెలిపారు. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు.