ఉగ్రవాద నెట్‌వర్క్‌కు భారీ దెబ్బ

జమ్మూ: జమ్మూ కాశ్మీర్‌లోని కిష్త్వార్‌లోని చత్రో ప్రాంతంలో 326 రోజుల పాటు జరిగిన సుదీర్ఘమైన ఉమ్మడి ఆపరేషన్‌లో ఏడుగురు భయంకరమైన ఉగ్రవాదులను మట్టుబెట్టినట్లు భారత సైన్యంలోని(Indian Army) వైట్ నైట్ కార్ప్స్ సోమవారం తెలిపింది. జమ్మూ కాశ్మీర్‌లోని కిష్త్వార్‌లో  జైష్-ఎ-మొహమ్మద్ ఉగ్రవాదులను హతమార్చడాన్ని సైన్యం "ఉగ్రవాద నెట్‌వర్క్‌కు భారీ దెబ్బ"గా అభివర్ణించింది. కేంద్రపాలిత ప్రాంతంలోని ఎత్తైన ప్రాంతాలలో సవాలుతో కూడిన పరిస్థితుల్లో ఈ ఆపరేషన్ నిర్వహించబడిందని అధికారులు తెలిపారు.

కిష్త్వార్‌లో ఆదివారం భద్రతా దళాలతో జరిగిన ఎన్‌కౌంటర్‌లో పాకిస్తాన్‌కు చెందిన జైష్-ఎ-మొహమ్మద్ (జెఎం) ఉగ్రవాద సంస్థకు చెందిన సభ్యులు, దాని స్వయం ప్రకటిత కమాండర్‌తో సహా మరణించారు. అత్యంత ప్రతికూల పరిస్థితుల్లోనూ ఆర్మీ దళాలు, జమ్మూ కాశ్మీర్ పోలీసులు, సెంట్రల్ రిజర్వ్ పోలీస్ ఫోర్స్ ఉగ్రవాదులను ట్రాక్ చేశాయని వారు తెలిపారు. ఫిబ్రవరి 7న జమ్మూలో కేంద్ర హోంమంత్రి అమిత్ షా ఉన్నత స్థాయి భద్రతా సమీక్షా సమావేశానికి అధ్యక్షత వహించారు. జమ్మూలోని కొండ ప్రాంతాలలో దాక్కున్న ఉగ్రవాదులను నిర్మూలించడానికి మిషన్ మోడ్ విధానాన్ని అవలంబించాలని, కేంద్రపాలిత ప్రాంతంలో పూర్తి శాంతిని నెలకొల్పడానికి చొరబాట్లకు తావు లేకుండా చూడాలని కేంద్ర హోంమంత్రి భద్రతా దళాలను ఆదేశించారు.