ఆటోమేటెడ్ స్మార్ట్ రోటరీ కార్ పార్కింగ్ ప్రారంభించిన మేయర్ విజయలక్ష్మి

బంజారాహిల్స్ డివిజన్‌లో రూ. 8 కోట్లతో సీసీ రోడ్లకు శంకుస్థాపన

బస్తీ బాటలో క్షేత్రస్థాయి సమస్యలపై మేయర్ విజయలక్ష్మి ఆరా 

హైదరాబాద్ సిటీ బ్యూరో, నవంబర్ 29 (విజయక్రాంతి) : హైదరాబాద్ నగర అభివృద్ధిపై జీహెఎంసీ మేయర్ గద్వాల్ విజయ లక్ష్మి ప్రత్యేక దృష్టి సారించారు. శనివారం ఒకవైపు అత్యాధునిక సాంకేతికతతో కూడిన స్మార్ట్ పార్కింగ్‌ను ప్రారంభిస్తూనే.. మరోవైపు బస్తీల్లో పర్యటిస్తూ మౌలిక వసతుల కల్పనకు శ్రీకారం చుట్టారు. కేబీఆర్ పార్క్ వద్ద ట్రాఫిక్, పార్కింగ్ కష్టాలకు చెక్ పెడుతూ.. జీహెఎంసీ, నవ నిర్మాణ్ అసోసియేట్స్ సంయుక్త ఆధ్వర్యంలో నిర్మించిన ఆటోమేటెడ్ స్మార్ట్ రోటరీ కార్ పార్కింగ్ ను మేయర్ ఘనంగా ప్రారంభించారు.

ఈ ప్రారంభోత్సవ కార్యక్రమంలో ఎంపీ అనిల్ కుమార్ యాదవ్, డిప్యూటీ మేయర్ మోతే శ్రీలత శోభన్ రెడ్డి, అదనపు కమిషనర్ అనురాగ్ జయంతి పాల్గొన్నారు. ఈ సందర్భం గా మేయర్ విజయలక్ష్మి, ఎంపీ అనిల్, డిప్యూటీ మేయర్‌లు  కారులో కూర్చుని.. ఆటోమేటెడ్ లిఫ్ట్ ద్వారా కారు ఎలా పార్క్ అవుతుందో పరిశీలించారు. ఈ స్మార్ట్ పార్కింగ్ అందుబాటులోకి రావడంతో కేబీఆర్ పార్క్ సందర్శకులకు పార్కింగ్ కష్టాలు శాశ్వతంగా తొలగిపోనున్నాయి.

అంతకుముందు శనివారం ఉదయం మేయర్ తన సొంత డివిజన్ అయిన బంజారాహిల్స్‌లో బస్తీ బాట చేపట్టారు. ఉదయ్ నగర్, రోడ్డు నంబర్ 13, ప్రేమ్ నగర్, శ్రీరామ్ నగర్, సింగడి కుంట ప్రాంతాల్లో అధికారులతో కలిసి విస్తృతంగా పర్యటించారు. ఈ సందర్భంగా బస్తీల్లో రవాణా వ్యవస్థను మెరుగు పరిచేందుకు రూ. 8 కోట్ల వ్యయంతో నిర్మించనున్న సీసీ రోడ్ల పనులకు ఆమె శంకు స్థాపన చేశారు.

మేయర్ స్వయంగా బస్తీ వాసులతో మాట్లాడి వారి సమస్యలను అడిగి తెలుసుకున్నారు. పెండింగ్‌లో ఉన్న పనులను, సమస్యలను యుద్ధ ప్రాతిపదికన పరిష్కరించాలని అధికారులకు అక్కడికక్కడే ఆదేశాలు జారీ చేశారు. మేయర్ తమ వద్దకు వచ్చి సమస్యలు తెలుసుకోవడం పట్ల స్థానికులు హర్షం వ్యక్తం చేశారు.