నిరంతరం గుర్తుండేలా గ్రామస్థుల నిర్ణయం

మహబూబాబాద్, నవంబర్ 30 (విజయక్రాంతి): నిస్వార్థంగా గ్రామ అభివృద్ధి, ప్రజా సంక్షేమానికి పాటుపడి ఏండ్ల తరబడి సర్పంచుగా పనిచేసిన వారిని నిరంతరం గుర్తుంచుకునే విధంగా వారి తదనంతరం గ్రామాల్లో శిలా విగ్రహాలు ఏర్పాటుచేశారు. మహబూబాబాద్ జిల్లాలోని రెండు గ్రామాల్లో మాజీ సర్పంచుల విగ్రహాలను గ్రామస్థులు ఏర్పాటు చేసి, నిరంతరం స్మరించుకుంటున్నారు.

ఇనుగుర్తిలో గండు ఐలయ్య

మహబూబాబాద్ జిల్లాలోని ఇనుగుర్తి పంచాయతీకి ఏకగ్రీవంగా సర్పంచ్‌గా ఎన్నికై ప్రజాసంక్షేమం, గ్రామాభివృద్ధి కోసం కృషిచేసిన దివంగత గండు ఐలయ్యకు గ్రామం లో శిలా విగ్రహం ఏర్పాటు చేశారు. 1971 నుంచి 1983 వరకు ఐలయ్య గ్రామ సర్పంచ్‌గా బాధ్యతలు నిర్వర్తించారు. ఆ కాలంలో ఆయన గ్రామాభివృద్ధికి విశేషంగా కృషి చేశారు. బలహీనవర్గాల నేతగా మహబూబాబాద్ ప్రాంతంలో పేరు గడించి అసెంబ్లీ ఎన్నికల్లో టిడిపి నుండి పోటీ చేసి స్వల్ప ఓట్ల తేడాతో పరాజయం పాలయ్యాడు.

గుర్తుతెలియని వ్యక్తుల చేతిలో హత్యకు గురైన గండు ఐలయ్యను గ్రామస్తులు నిరంతరం గుర్తుంచుకునే విధంగా గ్రామ నడి బొడ్డున ఆయన శిలా విగ్రహాన్ని ఏర్పాటు చేశారు. ఐలయ్య మరణానంతరం ఆయన సతీమణి సావిత్రమ్మ  గ్రామ సర్పంచ్‌గా 8 ఏళ్లపాటు బాధ్యతలు నిర్వహించారు. ఆ తర్వాత వారి కుమారుడు విజయ్ కూడా ఐదేళ్లపాటు సర్పంచ్‌గా బాధ్యతలు నిర్వహించడం విశేషం. 

బేరువాడలో మన్మోహన్‌రెడ్డి

ఇదే జిల్లా కేసముద్రం మండలం బేరువాడ సర్పంచుగా సుమారు 50 ఏళ్ల క్రితం జన్నారెడ్డి మన్మోహన్‌రెడ్డి సర్పంచ్‌గా బాధ్యతలు నిర్వహించారు. భూస్వామిగా పేరున్న మన్మోహన్‌రెడ్డి తన భూముల్లో కొంత భూమిని పేదలకు ఇచ్చాడు. పేదలకు ఇళ్ల స్థలాలకు ఇచ్చాడు. గ్రామపంచాయతీ భవనాన్ని నిర్మించాడు. గ్రామాభివృద్ధికి, పేదల సంక్షేమానికి నిస్వార్ధంగా పనిచేసిన మన్మోహన్‌రెడ్డి మహబూబాబాద్ తొలి ఎంపీపీగా కూడా బాధ్యతలు నిర్వహించారు. మన్మోహన్‌రెడ్డి గ్రామానికి చేసిన సేవలు భవిష్యత్ తరాలకు గుర్తుండే విధంగా గ్రామంలో ఆయన శిలావిగ్రహాన్ని ఏర్పాటుచేసి ఆయనపై తమకున్న మమకారాన్ని చాటు కున్నారు.