ఆయన ఇచ్చిన గిఫ్ట్.. నా లైఫ్‌లో నిశ్శబ్ద పాఠం!

‘ఇతరులను ఆకర్షించే క్రమంలో మనల్ని మనం కోల్పోతాం. కానీ, మనం వేసుకున్న నకిలీ ముసుగులను తీసేసి మనలా మనం ఉండటమే జీవితంలో నిజమైన ఎదుగుదల’ అంటోంది టాలీవుడ్ బ్యూటీ రాశీ ఖన్నా. ఉన్నట్టుండీ ఈ ముద్దుగుమ్మ వ్యక్తిత్వం గురించి చెప్తుండటం ఏంటి? అనుకుంటున్నారా?! ఈ చిన్నది ప్రస్తుతం సూపర్ స్టార్ రజినీకాంత్ ప్రధాన పాత్రలో నటిస్తున్న ‘ధర్మన్’చిత్రంలో హీరోయిన్‌గా నటిస్తోంది.

ఈ మూవీ షూటింగ్ సెట్స్‌లో తాజాగా రజినీకాంత్‌తో తనకు జరిగిన ఒక ఆసక్తికరమైన సంఘటనను సోషల్ మీడియా వేదికగా అభిమానులతో పంచుకుంది. “షూటింగ్ గ్యాప్‌లో ఒకరోజు మేమిద్దరం మాట్లాడుకుంటున్న సమయంలో ఆధ్యాత్మికత గురించి చర్చ వచ్చింది. ఆ సమయంలో రజినీకాంత్ ‘లివింగ్ విత్ ది హిమాలయన్ మాస్టర్స్’ అనే పుస్తకం పేరు చెప్పి, ఈ బుక్ ఎప్పుడైనా చదివావా? అని అడిగారు.

దానికి నేను లేదు అని చెప్పడంతో, రజినీకాంత్ మాట వరుసగా వదిలేయకుండా.. రెండు రోజులకే ఆ పుస్తకాన్ని స్వయంగా కొని తెచ్చి తనకు గిఫ్ట్‌గా ఇచ్చారు. రజినీ సర్ ఈ పుస్తకాన్ని నాకు ఇవ్వడమే కాదు, ‘దీనిపై నిన్ను ఆ తర్వాత ప్రశ్నలు కూడా అడుగుతాను’ అని చెప్పారు. ఆయన ఎక్కడ టెస్ట్ పెడతారో అని గత కొన్ని వారాలుగా ఈ పుస్తకాన్ని ఎంతో శ్రద్ధగా, క్రమం తప్పకుండా చదువుతున్నా. నిజానికి ఈ బుక్ చదవడం నాకెంతో నచ్చింది.

చదువుతున్న కొద్దీ కొన్ని పేజీలు నన్ను ఆలోచింపజేస్తున్నాయి. ఈ పుస్తకం చదవడం వల్ల ఒక గొప్ప జీవిత సత్యాన్ని కూడా నేను నేర్చుకున్నా. మనల్ని ఎవరో మెచ్చుకోవాలని, ఇతరులను ఆకట్టుకోవడం కోసం వేరే వాళ్లలా నటించడం మొదలుపెడతాం. అలా ఏళ్ల తరబడి ఇతరుల కోసం జీవిస్తూ మ న అసలు వ్యక్తిత్వాన్ని కోల్పోతాం.

అందుకే ప్రశాంతంగా ఉన్నప్పుడు ఆ నిశ్శబ్దం మనల్ని భయపెడుతుంది. జీవితంలో నిజమైన ఎదుగుదల అంటే కొత్తగా ఏదో అయిపోవడం కాదు, మనం వేసుకున్న నకిలీ ముసుగులను తీసేసి మనలా మనం ఉండటమే అని ఈ పుస్తకం ద్వారా తెలుసుకున్నా. రజినీకాంత్ ఇచ్చిన ఈ గిఫ్ట్ నా జీవితంలో ఒక నిశ్శబ్ద పాఠం లాంటిది” అని తెలిపింది రాశీ.