ఓటు సవరణ ‘మహా’ యజ్ఞం

1. రంగారెడ్డి ‘ఎనిమిది’ దిక్కుల్లో బీఎల్వోల బెంబేలు!
2. ఐటీ హబ్ నుంచి పల్లెల దాకా ఓటర్ల తప్పుల తడక
3. అపార్ట్మెంట్లలోకి నో ఎంట్రీ.. 
4. పల్లెల్లో 2002 రికార్డుల ‘మ్యాపింగ్’ తలనొప్పి
5. తీవ్ర ఒత్తిడిలో మహిళా సిబ్బంది.. సపోర్టింగ్ స్టాఫ్ కావాలని డిమాండ్

రంగారెడ్డి, జులై 8 (విజయక్రాంతి): రాష్ట్ర ఎన్నికల సంఘం చేపట్టిన ‘స్పెషల్ ఇంటెన్సివ్ రివిజన్’ (సర్ ) ప్రక్రియ రంగారెడ్డి జిల్లాలోని ఎనిమిది కీలక నియోజకవర్గాల్లో (మహేశ్వరం, చేవెళ్ల, షాద్నగర్, ఇబ్రహీంప ట్నం, ఎల్బీనగర్, రాజేంద్రనగర్, శేర్లింగంపల్లి, కల్వకుర్తి) బూత్ లెవల్ ఆఫీసర్లకు (బీ ఎల్ ఓ ) అగ్నిపరీక్షగా మారింది.

విద్యావంతుల నిర్లక్ష్యం: ఉన్నత విద్యావంతులు సైతం ఫామ్-6, కాలమ్ -8 లలో తప్పుల తడకగా వివరాలు నింపుతుండడంతో, టెన్త్ లోపు చదివిన అంగన్వాడీ, ఆశా వర్కర్లకు వాటిని సరిదిద్దడం తలనొప్పిగా మారింది.

ఐటీ హబ్లో ‘నో ఎంట్రీ’: శేర్లింగంపల్లి, ఎల్బీనగర్ పరిధిలోని గేటెడ్ కమ్యూనిటీలు, హైరైజ్ అపార్ట్మెంట్లలోకి మహిళా బీఎల్వోలను సెక్యూరిటీ సిబ్బంది రానివ్వడం లేదు.

ఒంటరి ప్రయాణం భద్రత కరువు: రాజేంద్రనగర్, మహేశ్వరంలోని కొన్ని సున్నితమైన ప్రాంతాల్లో సపోర్టింగ్ స్టాఫ్ లేకపోవడంతో ఒంటరిగా ఇళ్లలోకి వెళ్ళడానికి మహిళా సిబ్బంది భయపడుతున్నారు.

చిరునామాల గందరగోళం: ఇబ్రహీంపట్నం, షాద్నగర్ లలో రియల్ ఎస్టేట్ మార్పుల వల్ల ఇళ్లు ఖాళీ చేసిన వేలాది మంది ఓటర్లను వెతికి పట్టుకోవడం సవాల్గా మారింది.

2002 రికార్డుల ’మ్యాపింగ్’ పెనుభారం: చేవెళ్ల, కల్వకుర్తి వంటి గ్రామీణ ప్రాంతా ల్లో ప్రస్తుత ఓటర్ల డేటాను 2002 నాటి రికార్డులతో లింక్ చేయాలన్న నిబంధన సాంకేతిక గందరగోళానికి దారితీస్తోంది.

సస్పెన్షన్ల కత్తి: తమ రెగ్యులర్ డ్యూటీలతో పాటు ఈ అదనపు భారాన్ని మోస్తున్న సిబ్బందికి, టార్గెట్లు రీచ్ కాకపోతే అధికారులు షోకాజ్ నోటీసులు, సస్పెన్షన్లు ఇస్తుండడంతో తీవ్ర మానసిక ఒత్తిడికి లోనవుతున్నారు. ఈ గందరగోళం వీడాలంటే పట్టణాల్లో వార్డు ఆఫీసర్లను, పల్లెల్లో పంచాయతీ సెక్రటరీలను బీఎల్వోలకు ’సపోర్టింగ్ స్టాఫ్’గా అటాచ్ చేయాలని, సర్వే గడువును పెంచాలని సిబ్బంది డిమాండ్ చేస్తున్నారు.