6 April, 2026 | 4:56 AM 
గొంతు స్వరాల నాదం
06-04-2026 02:05 AM
మనసు మౌనాన్ని మాటగా మలిచే
మాయాద్వారం గొంతు
నిశ్శబ్దపు లోతుల్లో
ముద్దాడిన భావాలు ఇక్కడే స్వరాలై
ప్రపంచాన్ని తాకుతాయి !
అమ్మప్రేమలోని మాధుర్యం
ఇక్కడి నుంచే ఆవిర్భవిస్తుంది
నాన్న పలుకుల్లోని గాంభీర్యం
ఇక్కడి నుంచే ప్రతిధ్వనిస్తుంది
పాట పుడితే
గొంతు గంగలా పారుతుంది
వేదన చెందితే!
గాలి సైతం గడ్డకడుతుంది
ఆ గొంతు
ప్రేమను పలుకగలదు
పోరాటాన్ని రగిలించగలదు
ప్రార్థనగా మోగగలదు
గొంతు
శబ్దానికి మార్గం
ఆత్మకు అద్దం
అభిప్రాయానికి ఆయుధం
గొంతు - స్వరాల గర్భగుడి
మనిషి గుండె చప్పుడు
సరిగమలుగా వెలువడే ఊట చెలిమె !
కొలిపాక శ్రీనివాస్
