ఇండోర్: మధ్యప్రదేశ్‌లోని ఇండోర్(Indore) జిల్లాలో ఒక వివాహ వేడుక నుంచి తిరిగి వస్తుండగా సోమవారం తెల్లవారుజామున వారు ప్రయాణిస్తున్న నాలుగు చక్రాల వాహనం ఒక ట్రక్కును ఢీకొనడంతో ముగ్గురు మృతి చెందగా, తొమ్మిది మంది గాయపడ్డారని పోలీసులు తెలిపారు.  బాధితులంతా 19 నుండి 24 ఏళ్ల మధ్య వయస్సు గల వారే ఉన్నారు. ఇండోర్-నేమావర్ రహదారిపై తెల్లవారుజామున సుమారు 1:30 గంటల సమయంలో ఈ ప్రమాదం జరిగిందని అసిస్టెంట్ సబ్-ఇన్‌స్పెక్టర్ (ASI) జగదీష్ రాథోడ్ తెలిపారు. బాధితులు పొరుగున ఉన్న దేవాస్ జిల్లాలో జరిగిన వివాహ వేడుకకు హాజరై ఇండోర్‌కు తిరిగి వస్తుండగా, వారి మల్టీ-యూటిలిటీ వెహికల్ (MUV) ఒక ట్రక్కును ఢీకొంది. ఈ ప్రమాదంలో వాహనంలో ఉన్న ముగ్గురు మరణించారని ఆయన పేర్కొన్నారు. 

ప్రమాదం జరిగిన తర్వాత ఘటనా స్థలం నుండి పారిపోయిన ట్రక్ డ్రైవర్ కోసం గాలింపు చర్యలు కొనసాగుతున్నాయని అసిస్టెంట్ సబ్-ఇన్‌స్పెక్టర్ సూచించారు. గాయపడిన వారిని ప్రభుత్వ మహారాజా యశ్వంతరావు ఆసుపత్రికి తరలించినట్లు అధికారులు తెలిపారు. ప్రస్తుతంక్షతగాత్రులు కోలుకుంటున్నారని వైద్యులు తెలిపారు. స్థానికులు ట్రక్కుకు నిప్పు పెట్టడానికి ప్రయత్నించడంతో ఉద్రిక్తతలు చెలరేగాయి. రంగంలోకి దిగిన పోలీసులు పరిస్థితిని అదుపులోకి తీసుకువచ్చారు. ఈ ఘటనపై కేసు నమోదు చేసుకున్న పోలీసులు మృతదేహాలను స్వాధీనం చేసుకుని పోస్టుమార్టం నిమిత్తం మార్చురీకి తరలించారు.