సైలెంట్‌గా పెళ్లిపీటలెక్కిన టాలీవుడ్ జంట

టాలీవుడ్‌కు చెందిన మరో జంట సైలెంట్‌గా పెళ్లిపీటలెక్కేసింది. ‘కలర్ ఫోటో’ దర్శకుడు సందీప్ రాజ్, నటి చాందినీరావు మూడు ముళ్ల బంధం లోకి అడుగుపెట్టారు. శనివారం వీరి వివాహం తిరుమలలో జరిగింది. ‘కలర్ ఫోటో’ చిత్రంలో చాందినీరావు ఓ చిన్న పాత్ర పోషించారు. ఈ సినిమా చిత్రీకరణ సమయంలోనే సందీప్, చాందినీల మధ్య పరిచయం కాస్త ప్రేమగా మారింది. శనివారం ఇరువైపుల పెద్దల సమక్షంలో వీరిద్దరూ ఒక్కటయ్యారు.

షార్ట్ ఫిల్మ్‌లతో కెరీర్ ప్రారంభించిన సందీప్ రాజ్‌కు ‘కలర్ ఫోటో’ చిత్రం మంచి గుర్తింపు తెచ్చిపెట్టింది. ఈ సినిమా మంచి విజయం సాధించడమే కాకుండా ఉత్తమ తెలుగు చిత్రం విభాగంలో జాతీయ పురస్కారం సైతం కైవసం చేసుకుంది. ప్రస్తుతం సందీప్ రాజీవ్ కనకాల తనయుడు రోషన్‌తో ‘మోగ్లీ’ చిత్రాన్ని రూపొందిస్తున్నారు.