జాదవ్ పయెంగ్‌కు ‘సంకల్ప కిరణ్’ పురస్కారం

హైదరాబాద్, నవంబర్ 29 (విజయక్రాంతి): సుచిరిండియా ఫౌండేషన్ ఆధ్వర్యంలో శుక్రవారం సాయంత్రం హైటెక్ సిటీ శిల్పారామంలోని మౌంటైన్ హైట్స్‌లో ‘సంకల్ప్ దివస్’ కార్యక్రమం ఘనంగా జరిగింది. ఈ కార్యక్రమంలో వ్యాపారవేత్త లయన్ డాక్టర్ వై. కిరణ్ తన బర్త్ డే పురస్కరించుకొని ప్రతి సంవత్సరం నవంబర్ 28న సంకల్ప దివాస్ ను నిర్వహిస్తూ వస్తున్నారు. లయన్ డాక్టర్ వై. కిరణ్ సమాజ సేవ చేయడంతో పాటు.. సమాజానికి సేవ చేస్తున్న ప్రముఖులని గుర్తించి, వారిని  సత్కరిస్తూ వస్తున్నారు.

ఈ సందర్భంగా “ఫారెస్ట్ మ్యాన్ ఆఫ్ ఇండియా” పద్మశ్రీ జాదవ్ పయెంగ్‌ను ‘సంకల్ప కిరణ్’ పురస్కారంతో మాజీ ఉపరాష్ర్టపతి వెంకయ్యనాయుడు, సుచిరిండి యా ఫౌండేషన్ అధినేత లయన్ డాక్టర్ వై. కిరణ్ సత్కరించారు. తెలంగాణ వెదర్ మ్యాన్‌గా పేరొందిన బాలాజీ తరిణి, సామాజిక కార్యకర్త ఖ్వాజా మొయినుద్దీన్, విఆర్ ఫౌండేషన్ వ్యవస్థాపకులు సి. ప్రవీణ్ కుమార్ యాదవ్, కంటెంట్ క్రియేటర్, వీడియో ఎడిటర్ పి.చంద్రశేకర్‌లకు సంకల్ప సంజీవని పురస్కారాలను అందజేసి సన్మానించారు.

వెంకయ్యనాయుడు మాట్లాడు తూ.. ఈ  కార్యక్రమానికి హాజరు కావడం తనకు ఎంతో హ్యాపీగా ఉందన్నారు. కిరణ్ లాంటి వ్యక్తులు అరుదుగా ఉంటారన్నారు. ఆయన జీవితం స్ఫూర్తిదాయకమన్నారు. పద్మశ్రీ జాదవ్ పయెంగ్‌కు ప్రకృతి, పర్యావరణం అంటే ప్రాణం.. జీవరాశి మనుగడ, పర్యావరణ పరిరక్షణ కోసం 42 ఏళ్లుగా మొక్కలు నాటుతూనే ఉన్నారని చెప్పారు. లయన్ డాక్టర్ వై. కిరణ్ మాట్లాడుతూ.. పద్మశ్రీ జాదవ్ పయెంగ్‌ను సత్కరించడం కోసమే.. మాజీ ఉపరాష్ర్టపతి ఎం.వెంకయ్యనాయుడు వచ్చారన్నారు.

అలాంటి గొప్ప వ్యక్తి  పద్మశ్రీ జాదవ్ ని సత్కరించడం ఆనందంగా ఉందన్నారు. ఈ సంకల్ప్ దివాస్ లో ఇప్పుడు రెండు గ్రామాలు, 50 పాఠశాలలు మరియు 3000 మంది స్పెషల్ చిన్నారులతో భాగమైన విషయాన్ని ప్రస్తావించారు. జాదవ్ పయెంగ్ మాట్లాడుతూ.. ఈ  పురస్కారం పొందటం గౌరవంగా భావిస్తున్నాన న్నారు. కిరణ్  చాలా గొప్ప వ్యక్తి. ఆయన చేసే గొప్ప సేవా కార్యక్రమాల గురించి చాలా వింటుంటాను. అలాంటి వ్యక్తితో వేదికను పంచుకోవడం  గొప్పగా ఉందన్నారు.