1. ఒకరికి షోకాజ్ నోటీస్
2. యాదగిరిగుట్ట గుడిలో బంగారు, వెండి డాలర్ల మాయంపై ఈవో చర్యలు       

సూర్యాపేట (యాదాద్రి భువనగిరి), జనవరి 31 (విజయక్రాంతి): తెలంగాణ తిరుపతిగా పేరుగాంచిన యాదాద్రి లక్ష్మీనరసింహస్వామి ఆలయ ప్రసాదశాలలో చింతపండు, ప్రచార శాఖలో ఉండాల్సిన బంగారం, వెండి డాలర్లు ఇటీవల మాయమైన విషయం విధితమే. అయితే ఈ అంశాలను తీవ్రంగా పరిగ ణించిన ఆలయ ఈవో భవానీశంకర్ ప్రాథమిక విచారణ అనంతరం బాధ్యులపై చర్యలు చేపట్టారు.

ఈ ఘటనపై అంతర్గత విచారణ అనంతరం దేవాలయ ప్రచార శాఖలో విధులు నిర్వహిస్తున్న జూనియర్ అసిస్టెంట్ పి రామచంద్రశేఖర్, రికార్డ్ అసిస్టెంట్ టి లక్ష్మి తమ విధుల పట్ల నిర్లక్ష్యం వహించినట్లు తేలడంతో వారిని శనివారం సస్పెండ్ చేశారు. అలాగే పర్యవేక్షకులు కె నటరాజు, సీతారామచార్యులకు చార్జి మెమోలు జారీ చేయడంతో పాటు ఏఈఓకు షోకాజ్ నోటీసులు ఇచ్చారు.

కాగా మాయమైన బంగారం, వెండి డాలర్లకు సంబంధించిన పూర్తి వివరాలు సేకరిస్తున్నామని, అవసరమైతే పోలీసులకు ఫిర్యాదు చేసి క్రిమినల్ విచారణకు కూడా సిద్ధంగా ఉన్నామని ఆలయ అధికారులు తెలిపారు. ఈ ఘటనపై సమగ్ర విచారణ కొనసాగుతున్నట్లు తెలిపారు.