-ఎంపీ రఘునందన్ రావు

సేవా కార్యక్రమాల్లో వాసవి క్లబ్ ఆదర్శం 

-నిర్మల జగ్గారెడ్డి

సంగారెడ్డి (విజయక్రాంతి): పర్యావరణ హితమైన వ్యాపారాలకు ప్రాధాన్యత ఇవ్వాలని వాసవి క్లబ్ ప్రతినిధులకు మెదక్ ఎంపీ రఘునందన్ రావు పిలుపునిచ్చారు. సంగారెడ్డి సమీపంలోని కంది లక్ష్మీ నరసింహ కన్వెన్షన్ సెంటర్‌లో జిల్లా గవర్నర్ ఇరుకుల్ల ప్రదీప్ ఆధ్వర్యంలో నిర్వహించిన స్వదీపోత్సవం కార్యక్రమంలో ఆయన ముఖ్య అతిథిగా పాల్గొన్నారు. ఈ కార్యక్రమానికి ఎమ్మెల్సీ అంజిరెడ్డి, టీజేఐసీ చైర్మన్ నిర్మల జగ్గారెడ్డి తదితరులు హాజరయ్యారు. ఎంపీ మాట్లాడుతూ, వాసవి క్లబ్ వారు కేవలం తమ వర్గానికే కాకుండా సమాజంలోని అన్ని వర్గాల కోసం ఎన్నో సేవా కార్యక్రమాలు అందించడం అభినందనీయం అన్నారు. వ్యాపారులు ప్లాస్టిక్ వినియోగాన్ని పూర్తిగా మానుకోవాలని, పర్యావరణ పరిరక్షణలో తమ వంతు బాధ్యత నెరవేర్చాలని సూచించారు.

దేశ అభివృద్ధిలో ప్రతి ఒక్కరి పాత్ర ఎంతో ముఖ్యమని, ప్రధాని మోడీ చూపుతున్న మార్గంలో ప్రజలు ముందుకు సాగాల్సిన అవసరం ఉందన్నారు. ఎమ్మెల్సీ అంజిరెడ్డి మాట్లాడుతూ వాసవి క్లబ్ ఆధ్వర్యంలో నిరంతరం జరుగుతున్న సేవా కార్యక్రమాలు సమాజానికి ఆదర్శమని, తాను కూడా ఎల్లప్పుడూ సహకరించేందుకు సిద్ధంగా ఉంటానని పేర్కొన్నారు. టీజేఐసీ చైర్మన్ నిర్మల జగ్గారెడ్డి మాట్లాడుతూ ఆర్యవైశ్యులు సంపాదనలో కొంత భాగాన్ని సేవా కార్యక్రమాలకు ఖర్చు చేయడం ప్రశంసనీయమని తెలిపారు. పేదలకు దుప్పట్లు పంచడం, పాఠశాలలకు బల్లలు అందించడం, వినాయక చవితి సందర్భంగా మట్టి గణపతులను ఉచితంగా పంపిణీ చేయడం వంటి కార్యక్రమాలు తాను స్వయంగా గమనించానని చెప్పారు.

తాను, తన భర్త జగ్గారెడ్డి ఎల్లప్పుడూ ఆర్యవైశ్యులకు అండగా ఉంటామని పేర్కొన్నారు. ఆర్యవైశ్య మహాసభ ఉపాధ్యక్షుడు తోపాజీ అనంత కిషన్ మాట్లాడుతూ వాసవి క్లబ్ సేవలు కుల, మత సంబంధం లేకుండా అందరికీ చేరుతుండటం గర్వకారణమన్నారు. జిల్లా గవర్నర్ ఇరుకుల్ల ప్రదీప్ అనేక సేవా కార్యక్రమాలు నిర్వహించడం అభినందనీయమని పేర్కొన్నారు. ఈ సందర్భంగా వివిధ క్లబ్బులకు మెమెంటోలు అందజేశారు. కార్యక్రమంలో సిద్ధ సూర్యప్రకాశరావు, మానేపల్లి రామారావు, పుల్లూరు ప్రకాశ్, దర్శి శ్రీనివాసరావు గుప్తా, మాజీ సీడీసీ చైర్మన్ విజయేందర్ రెడ్డి, భానూరి నరసింహులు, జూలకంటి బుచ్చిలింగం, కొంపల్లి విద్యాసాగర్, తెలంగాణ వర్కింగ్ జర్నలిస్టుల యూనియన్ జిల్లా అధ్యక్షుడు బండారు యాదగిరి, కెమిస్ట్ అసోసియేషన్ ప్రధాన కార్యదర్శి అనుముల సంతోష్ కుమార్, కంది చందు గుప్తా తదితరులు పాల్గొన్నారు.