విద్యార్థులు చట్టాలపై అవగాహన కలిగి ఉండాలి
ఝరాసంగం, నవంబర్ 21 (విజయక్రాంతి): విద్యార్థులు చదువుతోపాటు సాధారణ చట్టాలపై అవగాహన కలిగి ఉండాలని సీనియర్ సివిల్ జడ్జి కవితదేవి సూచించారు. జహీరాబాద్ మండల లీగల్ సర్వీసెస్ కమిటీ (Legal Services Committee) ఆధ్వర్యంలో కస్తూర్బా గాంధీ బాలికల హాస్టల్లో నిర్వహించిన అవగాహన సదస్సులో ఆమె పాల్గొని విద్యార్థులకు పలు అంశాలపై వివరించారు.
ఈ సందర్భంగా మాట్లాడుతూ ప్రతి విద్యార్థి క్రమశిక్షణతో మెలగాలని, చదువుపై శ్రద్ధ వహించి ఉన్నత లక్ష్యాలను సాధించాలని సూచించారు. పెద్దలను, తోటి విద్యార్థులను గౌరవించాలని, చదువుతోపాటు చట్టాల (Laws) గురించి తెలుసుకోవాలని అన్నారు. బాలికలు, మహిళల పట్ల ఎవరైనా అసభ్యంగా లేదా దురుసుగా ప్రవర్తిస్తే కఠిన శిక్షలు ఎదుర్కోవాల్సి ఉంటుందని హెచ్చరించారు.
విద్యార్థినులకు గుడ్ టచ్, బ్యాడ్ టచ్ (Good Touch and Bad Touch) గురించి వివరించి, అనుచిత ప్రవర్తన ఎదురైతే అప్రమత్తంగా ఉండాలని సూచించారు. ఉపాధ్యాయులు విద్యార్థులకు దిశానిర్దేశం చేసే మార్గదర్శకులని, వారిని గౌరవించడం ప్రతి ఒక్కరి బాధ్యతని తెలిపారు. ప్రతి విద్యార్థి ఒక లక్ష్యాన్ని నిర్దేశించుకుని, దాని సాధనకు ఉపాధ్యాయుల సహకారం తీసుకుంటూ ఉన్నత శిఖరాలను అధిరోహించాలని ఆకాంక్షించారు.
అనంతరం హాస్టల్లో మధ్యాహ్న భోజనాన్ని తనిఖీ చేసి, విద్యార్థులకు అందిస్తున్న భోజన నాణ్యతను పరిశీలించారు. ఈ కార్యక్రమంలో న్యాయవాదులు, ప్రధానోపాధ్యాయులు, లీగల్ సర్వీసెస్ సిబ్బంది, ఉపాధ్యాయులు, విద్యార్థులు పాల్గొన్నారు