విద్యార్థులే ఉపాధ్యాయులు.. విద్యార్థులే పాలకులు
దేశాయిపేట ప్రభుత్వ పాఠశాలలో ఘనంగా స్వయం పరిపాలన దినోత్సవం
బాన్సువాడ,(విజయక్రాంతి): విద్యార్థుల్లో దాగి ఉన్న నాయకత్వ లక్షణాలు, ఆత్మవిశ్వాసం, బాధ్యతాయుతమైన నిర్ణయాలు తీసుకునే సామర్థ్యాన్ని వెలికితీసేందుకు నిర్వహించిన స్వయం పరిపాలన దినోత్సవం(Self-Governance Day) కామారెడ్డి జిల్లా బాన్సువాడ మండలం దేశాయిపేట జడ్.పి.హెచ్.ఎస్ ప్రభుత్వ ఉన్నత పాఠశాల(Desaipet ZPHS Government High School)లో సోమవారం ఉత్సాహంగా నిర్వహించారు.
ఈ సందర్భంగా విద్యార్థులే(students) ఉపాధ్యాయులుగా, విద్యార్థులే పాఠశాల నాయకులుగా బాధ్యతలు చేపట్టి పాఠశాల నిర్వహణలో భాగస్వాములయ్యారు. ఉపాధ్యాయుల పాత్రను పోషిస్తూ పాఠాలు బోధించడంతో పాటు, వివిధ నిర్వహణ బాధ్యతలను చేపట్టి తమ ప్రతిభను చాటుకున్నారు. విద్యార్థుల్లో నాయకత్వ లక్షణాలు, క్రమశిక్షణ, సమయపాలన, బాధ్యతాయుతమైన ఆలోచనా విధానాన్ని పెంపొందించడమే ఈ కార్యక్రమ ప్రధాన ఉద్దేశమని పాఠశాల ప్రధానోపాధ్యాయురాలు నివేదిత తెలిపారు.
విద్యార్థుల ఆత్మవిశ్వాసం, చొరవ, నాయకత్వ ప్రతిభను చూసి పాఠశాల ఉపాధ్యాయులు హర్షం వ్యక్తం చేశారు. ఇలాంటి కార్యక్రమాలు భవిష్యత్తులో సమాజానికి బాధ్యతాయుతమైన నాయకులను అందించేందుకు దోహదపడతాయని పేర్కొన్నారు.ఈ కార్యక్రమంలో పాఠశాల ప్రధానోపాధ్యాయురాలు నివేదిత, ఉపాధ్యాయులు, విద్యార్థులు తదితరులు పాల్గొన్నారు.