పులివెందులలో మళ్లీ టెన్షన్
అవినాష్ రెడ్డి ఇంటి వద్ద హైడ్రామా.. పోలీసులతో ఎంపీ వాగ్వాదం!
కడప: ఆంధ్రప్రదేశ్లోని కడప జిల్లా పులివెందులలో మరోసారి రాజకీయ ఉద్రిక్తత నెలకొంది. తెల్లవారుజామునే ఎంపీ వైఎస్ అవినాష్ రెడ్డి(YS Avinash Reddy) నివాసం వద్ద భారీగా పోలీసులు మోహరించడం చర్చనీయాంశంగా మారింది. కన్నంపల్లి ప్రాంతంలోనూ ఉద్రిక్త వాతావరణం కనిపించింది. ఈ క్రమంలో ఎంపీకి నోటీసులు అందజేసేందుకు సీఐ పురుషోత్తంరాజు(CI Purushotham Raju) అక్కడికి చేరుకున్నారు. పులివెందులలో Police Act అమల్లో ఉందని, నిబంధనల ప్రకారం బయటకు రావద్దంటూ అవినాష్ రెడ్డికి నోటీసులు ఇచ్చేందుకు పోలీసులు ప్రయత్నించినట్లు సమాచారం. దీంతో అక్కడ కొంతసేపు హైటెన్షన్ వాతావరణం ఏర్పడింది. పోలీసుల తీరుపై గ్రామస్తులు ఎంపీకి ఫిర్యాదు చేసినట్లు తెలుస్తోంది. పోలీసులు తమను బెదిరిస్తున్నారని వారు ఆవేదన వ్యక్తం చేసినట్లు సమాచారం.
ఈ పరిణామాలపై అవినాష్ రెడ్డి సీఐ పురుషోత్తంరాజును ప్రశ్నించారు. "నామినేషన్లను అడ్డుకోవాలని మీకు ఆదేశాలు ఇచ్చారా?" అంటూ నిలదీసినట్లు సమాచారం. ఎన్నికల ప్రక్రియ నేపథ్యంలో ఇప్పటికే పులివెందులలో పోలీసు ఆంక్షలు, రాజకీయ వర్గాల మధ్య ఆరోపణలు కొనసాగుతున్నాయి. తాజా నోటీసుల వ్యవహారం స్థానికంగా మరోసారి చర్చకు దారితీసింది. పోలీసుల చర్యలకు సంబంధించిన పూర్తి వివరాలు తెలియాల్సి ఉంది.