రణ్‌వీర్‌కు సచిన్ ఆఫర్

22-11-2026 | 02:05pm

సచిన్‌తో రణ్‌వీర్ సరదా ఛాలెంజ్.. చివర్లో అదిరిపోయే ఆఫర్!

83 సినిమా మ్యాజిక్.. రణ్‌వీర్‌ను క్రికెటర్‌గా ఊహించుకున్న సచిన్!

మైదానంలో తన ఆటతో కోట్లాది మంది అభిమానులను సంపాదించుకున్న క్రికెట్ దిగ్గజం సచిన్ టెండూల్కర్.. తాజాగా బాలీవుడ్ స్టార్ రణ్‌వీర్ సింగ్ నటనపై ప్రశంసలు కురిపించాడు. ముంబైలో జరిగిన Global Peace Honors 2026 కార్యక్రమంలో వీరిద్దరి మధ్య ఆసక్తికరమైన సంభాషణ జరిగింది. ముఖ్యంగా ‘83’ సినిమాలో మాజీ కెప్టెన్ కపిల్ దేవ్ పాత్రలో రణ్‌వీర్ నటనను సచిన్ ప్రత్యేకంగా అభినందించాడు. అతడిలో మంచి క్రికెటర్ అయ్యే లక్షణాలు కూడా ఉన్నాయని సరదాగా వ్యాఖ్యానించాడు.

రణ్‌వీర్ ప్రశ్నకు సచిన్ అదిరిపోయే సమాధానం!

ఈ కార్యక్రమంలో రణ్‌వీర్ సింగ్ సచిన్‌ను ఓ ఆసక్తికరమైన ప్రశ్న అడిగాడు. ‘‘మన పాత్రలు తారుమారైతే.. మనలో ఎవరు మంచి క్రికెటర్ అవుతారు? ఎవరు మంచి నటుడిగా రాణిస్తారు?’’ అని ప్రశ్నించాడు. దీనికి మాస్టర్ బ్లాస్టర్ తనదైన శైలిలో స్పందించాడు. ‘‘అదొక గూగ్లీ! మీరు సినిమాలో ఫాస్ట్ బౌలింగ్ చేశారు కదా? ఆ పాత్రలో అద్భుతంగా ఒదిగిపోయారు’’ అంటూ రణ్‌వీర్‌ను ప్రశంసించాడు. దీంతో అక్కడున్నవారిలో నవ్వులు విరిశాయి.

1983 వరల్డ్ కప్ జ్ఞాపకాలు గుర్తుచేసుకున్న మాస్టర్

ఈ సందర్భంగా సచిన్ 1983 World Cup విజయాన్ని గుర్తుచేసుకున్నాడు. చిన్నప్పటి నుంచి కపిల్ దేవ్‌ను చూస్తూ పెరిగామని, ఆ ప్రపంచకప్ విజయం తన క్రికెట్ ప్రయాణంపై ఎంతో ప్రభావం చూపిందని చెప్పాడు. అందుకే ‘83’ సినిమాలో రణ్‌వీర్ నటన చూసినప్పుడు అతడిని నిజమైన క్రికెటర్‌గా ఊహించుకోగలిగానని వివరించాడు. కపిల్ దేవ్ పాత్రకు రణ్‌వీర్ సరిగ్గా సరిపోయాడని కితాబిచ్చాడు.

సచిన్ నుంచి రణ్‌వీర్‌కు స్పెషల్ ఆహ్వానం!

ప్రశంసలతో ఆగకుండా సచిన్ రణ్‌వీర్‌కు ఓ సరదా ఆఫర్ కూడా ఇచ్చాడు. ‘‘ఎప్పుడైనా నెట్స్‌కు వచ్చి నాకు బౌలింగ్ చేయండి’’ అంటూ ఆహ్వానించాడు. దీంతో రణ్‌వీర్ సంతోషం వ్యక్తం చేశాడు. ఇక క్రికెటర్లకు నటన కొత్తేమీ కాదని సచిన్ సరదాగా వ్యాఖ్యానిస్తూ హర్భజన్ సింగ్, శ్రీశాంత్, ఇర్ఫాన్ పఠాన్ వంటి ఆటగాళ్ల పేర్లను ప్రస్తావించాడు. కాగా, కబీర్ ఖాన్ దర్శకత్వంలో తెరకెక్కిన ‘83’ సినిమా 1983లో భారత క్రికెట్ జట్టు సాధించిన చారిత్రక World Cup విజయాన్ని ఆధారంగా రూపొందింది. అందులో కపిల్ దేవ్ పాత్రలో రణ్‌వీర్ సింగ్ తన నటనతో ప్రేక్షకుల ప్రశంసలు అందుకున్నాడు. ఇప్పుడు సచిన్ నుంచి వచ్చిన ఈ కాంప్లిమెంట్‌తో ఈ సినిమా మరోసారి చర్చలోకి వచ్చింది.

మరిన్ని వార్తలు