పాడె మోస్తూ కన్నీటి పర్యంతమైన సీఎం
ముఖ్యమంత్రిగా ఎన్నో సవాళ్లను ఎదుర్కొన్న ఆ నాయకుడు.. కన్నతల్లికి వీడ్కోలు పలికే వేళ భావోద్వేగాన్ని ఆపుకోలేకపోయారు. తల్లి పార్థివ దేహానికి స్వయంగా పాడె మోస్తూ అంతిమయాత్రలో పాల్గొన్నారు. మాతృవియోగంతో కన్నీటిపర్యంతమైన యోగి ఆదిత్యనాథ్ను చూసి అక్కడున్నవారంతా భావోద్వేగానికి గురయ్యారు. ఉత్తరప్రదేశ్ ముఖ్యమంత్రి యోగి ఆదిత్యనాథ్ కుటుంబంలో తీవ్ర విషాదం నెలకొంది. ఆయన మాతృమూర్తి సావిత్రి దేవి మరణంతో కుటుంబ సభ్యులు శోకసంద్రంలో మునిగిపోయారు. ఉత్తరాఖండ్లో జరిగిన ఆమె అంతిమయాత్రలో యోగి స్వయంగా పాల్గొని తల్లికి తుది వీడ్కోలు పలికారు.
రాజకీయాల్లో కఠిన నిర్ణయాలు తీసుకుంటూ, ముఖ్యమంత్రిగా ఎంతో దృఢంగా కనిపించే యోగి ఆదిత్యనాథ్.. తల్లి అంతిమయాత్రలో మాత్రం భావోద్వేగాన్ని అదుపు చేసుకోలేకపోయారు. కన్నతల్లి పార్థివ దేహానికి స్వయంగా పాడె మోస్తూ ముందుకు సాగారు. మాతృవియోగంతో కన్నీళ్లు పెట్టుకున్న ఆయనను చూసి అక్కడున్నవారు సైతం చలించిపోయారు.సావిత్రి దేవి పార్థివ దేహాన్ని అంత్యక్రియల (Last Rites) కోసం చండీ ఘాట్ శ్మశానవాటికకు తరలించారు. అక్కడ కుటుంబ సభ్యులు, బంధువులు, ఇతర ప్రముఖుల సమక్షంలో అంతిమ సంస్కారాలు నిర్వహించారు.
తల్లి మరణంతో తీవ్ర విషాదంలో ఉన్న యోగి ఆదిత్యనాథ్ సామాజిక మాధ్యమం (Social Media) వేదికగా భావోద్వేగ సందేశాన్ని పంచుకున్నారు. ఈ ప్రపంచంలో తల్లి నీడకు మించిన రక్షణ లేదని, తల్లి ఆశ్రయానికి మించిన భరోసా మరొకటి ఉండదని పేర్కొన్నారు.బిడ్డకు తల్లి అందించే ప్రేమ, ఆప్యాయత, రక్షణ వెలకట్టలేనివని తన సందేశంలో గుర్తుచేసుకున్నారు.
పదవులు, అధికారం, హోదాలు ఎన్ని ఉన్నా.. తల్లి ముందు ప్రతి ఒక్కరూ బిడ్డలే! ముఖ్యమంత్రిగా కోట్లాది ప్రజలకు నాయకత్వం వహించే యోగి ఆదిత్యనాథ్.. కన్నతల్లికి తుది వీడ్కోలు పలికే వేళ ఓ కొడుకుగా కన్నీరు పెట్టుకున్న దృశ్యం పలువురిని కదిలించింది. తల్లీబిడ్డల అనుబంధం (Mother's Love) ఎంత గొప్పదో మరోసారి గుర్తుచేసింది.