నామినేషన్ ప్రక్రియలో జాగ్రత్తలు తప్పనిసరి

- అభ్యర్థి వెంట ఇద్దరు బలపరిచే వ్యక్తులకు మాత్రమే అనుమతి

- తహసీల్దార్ గిరిబాబు, ఎంపిడివో రాజు, ఎస్సై రాజు

వెంకటాపూర్(రామప్ప),(విజయక్రాంతి): గ్రామ పంచాయతీ ఎన్నికల నామినేషన్ ప్రక్రియలో అభ్యర్థులు ఎలాంటి పొరపాట్లు జరగకుండా అత్యంత జాగ్రత్తగా వ్యవహరించాలని తహసీల్దార్ గిరిబాబు, ఎస్సై చల్లా రాజు, ఎంపీడీవో మూడు రాజు సూచించారు. నామినేషన్ దాఖలు విధానం, అవసరమైన పత్రాలపై అధికారులు శనివారం తహసీల్దార్ కార్యాలయంలో అవగాహన కల్పించారు. ఈ సందర్భంగా అధికారులు మాట్లాడుతూ... నామినేషన్‌తో పాటు ఇద్దరు సాక్షులతో సెల్ఫ్ డిక్లరేషన్ తప్పనిసరిగా సమర్పించాలని, నామినేషన్ సమయంలో డిక్లరేషన్ సమర్పించకుండా ఉంటే, చివరి తేదీ సాయంత్రం 5 గంటల లోపులో సమర్పించాల్సి ఉంటుందని, డిక్లరేషన్‌కు అఫిడవిట్, నోటరీ అవసరం లేదని స్పష్టం చేశారు.

నామినేషన్ పత్రంలో ఉన్న అన్ని నిలువు వరుసలను పూర్తిగా పూరించాలని, ఏ కాలమ్‌ను ఖాళీగా వదలరాదని, సంబంధిత వివరాలు లేనప్పుడు సందర్భానుసారంగా ‘నిల్’ లేదా ‘వర్తించదు’ అని నమోదు చేయాలని సూచించారు. అభ్యర్థులు పోస్టల్, బ్యాంక్ లేదా ఇతర బ్యాంకుల్లో ఖాతాలు ఉన్నా, నామినేషన్ కోసం కొత్త బ్యాంక్ ఖాతా తప్పనిసరి అని అధికారులు తెలిపారు. ఎస్సీ, ఎస్టీ, బీసీ అభ్యర్థులు తప్పనిసరిగా కుల ధృవీకరణ పత్రం జత చేయాలని, సర్పంచ్, వార్డ్ మెంబర్ పోస్టులకు పోటీ చేసే వారు సెక్యూరిటీ డిపాజిట్ తప్పనిసరిగా చెల్లించాలని, నామినేషన్‌కు సంబంధించిన అన్ని సూచనలను కచ్చితంగా పాటించాలని అధికారులు అభ్యర్థులను కోరారు.