రామ్ పోతినేని హీరోగా నటిస్తున్న తాజాచిత్రం ‘ఆంధ్ర కింగ్ తాలూకా’. మైత్రి మూవీ మేకర్స్ నిర్మిస్తున్న ఈ చిత్రానికి మహేశ్ బాబు పీ దర్శకత్వం వహిస్తున్నారు. ఇందులో భాగ్యశ్రీబోర్సే కథానాయిక. కన్నడ సూపర్ స్టార్ ఉపేంద్ర ఈ సినిమాలో సూపర్ స్టార్‌గా కనిపించనున్నారు. రావు రమేశ్, మురళీశర్మ, సత్య, రాహుల్ రామకృష్ణ, వీటీవీ గణేశ్ కీలక పాత్రల్లో నటిస్తున్నారు. ఇప్పటికే ఈ సినిమా నుంచి విడుదలైన టైటిల్ గ్లింప్స్, పాటలు, టీజర్ లాంటి ప్రమోషనల్ కంటెంట్ సినీప్రియుల్లో ఉత్సాహాన్ని పెంచింది. 

తాజాగా సినిమా షూటింగ్ మొత్తం పూర్తి చేసుకుంది. చివరి పాట చిత్రీకరణతో సినిమా నిర్మాణ పనులు పూర్తయ్యాయి. డ్యాన్స్ మాస్టర్ జానీ కొరియోగ్రఫీలో హైదరాబాద్‌లోని సెట్‌లో నాయకానాయికలు రామ్, భాగ్యశ్రీబోర్సేలపై పాటను చిత్రీకరించారు.

ఈ సందర్భంగా హీరో రామ్ ఒక స్పెషల్ నోట్ షేర్ చేశారు. “షూటింగ్ పూర్తయింది. నేను గర్వపడే సినిమా.. మనమందరం గర్వపడే సినిమా! నా కెరీర్‌లో ఈ అందమైన సినిమా ఇచ్చిన మహేశ్‌కు ధన్యవాదాలు. నవంబర్ 28న ‘ఆంధ్ర కింగ్ తాలూకా’ మీ ముందుకు వస్తోంది” అని రామ్ ఆ నోట్‌లో పేర్కొన్నారు. 

ఇప్పుడు సినిమా టీమ్ మొత్తం పోస్ట్ ప్రొడక్షన్ పనులు, ప్రమోషనల్ క్యాంపైన్‌పై ఫోకస్ చేస్తోంది. ఈ చిత్రానికి వివేక్ సంగీతం అందిస్తుండగా, సిద్ధార్థ నూని సినిమాటోగ్రఫీ, శ్రీకర్ ప్రసాద్ ఎడిటింగ్, అవినాష్ కొల్లా ప్రొడక్షన్ డిజైన్ బాధ్యతలను నిర్వహిస్తున్నారు.