కరోనా తర్వాత ఆరోగ్య సంబంధమైన అంశాలకు ప్రాధాన్యత బాగా పెరిగింది. ముఖ్యంగా ప్రభుత్వ శాఖలతో కలిసి ప్రైవేట్ హాస్పిటల్స్ కీలక ఒప్పందాలు చేసుకుంటున్నాయి. తాజాగా హైదరాబాద్ లోని అంకుర హాస్పిటల్ ఫర్ ఉమెన్ & చిల్డ్రన్, అసోసియేషన్ ఫర్ ఆక్యుపేషనల్ హెల్త్ (AOH)-ఆంధ్రప్రదేశ్ బ్రాంచ్ సహకారంతో ఫ్రమ్ వోంబ్ టు వర్క్ ప్లేస్, బిల్డింగ్ ఎ కల్చర్ ఆఫ్ ప్రివెంటివ్ హెల్త్ అనే కార్పొరేట్ కంటిన్యూస్ ప్రొఫెషనల్ డెవలప్మెంట్ కార్యక్రమాన్ని విజయవంతంగా నిర్వహించింది. తల్లి, పిల్లల ఆరోగ్యం నుండి కార్యాలయ భద్రత మరియు ఉద్యోగుల శ్రేయస్సు వరకు జీవిత దశలలో నివారణ ఆరోగ్య సంరక్షణ యొక్క కీలక పాత్రను వివరించడనే దీని ప్రధాన ఉద్దేశం. ఈ కార్యక్రమానికి ముఖ్య అతిథిగా హాజరైన తెలంగాణ ప్రభుత్వ ఫ్యాక్టరీల డైరెక్టర్ శ్రీ వై. మోహన్ బాబు అంకుర హాస్పిటల్ చొరవను ప్రత్యేకంగా ప్రశంసించారు.

ఈ సిపిడి కార్యక్రమం అవగాహన పెంచడంలో, శ్రామికశక్తికి సురక్షితమైన, ఆరోగ్యకరమైన వాతావరణాన్ని అందించడంలో ముఖ్యమైన పాత్ర పోషిస్తాయని చెప్పారు. వృత్తిపరమైన ఆరోగ్య సంస్థల మధ్య బలమైన సహకారం ఈ సమయంలో అవసరమనీ,  ఇలాంటి కార్యక్రమాలు పరిశ్రమ, క్లినికల్ నైపుణ్యం ,ప్రజారోగ్య ప్రాధాన్యతలను గుర్తించడంలో కీలకంగా ఉంటాయని ఏవోహెచ్-ఏపీ బ్రాంచ్ లీడర్ అధ్యక్షులు డాక్టర్ నందకిషోర్ అభిప్రాయపడ్డారు. సిపిడి వేదిక ద్వారా ఉద్యోగుల శ్రేయస్సును కాపాడడంతో పాటు కార్పొరేట్ వ్యవస్థలలో కీలక మార్పులకు శ్రీకారం చుడుతుందని కార్యదర్శి డాక్టర్ సుధా బాలా అన్నారు.  ఈ కార్యక్రమంలో అంకుర హాస్పిటల్ కు చెందిన ప్రముఖ డాక్టర్లు,  ఏవోహెచ్-ఏపీ విభాగానికి చెందిన అధికారులు పాల్గొన్నారు.