న్యూఢిల్లీ: పరారీలో ఉన్న వజ్రాల వ్యాపారి మెహుల్ చోక్సీకి(Diamond Merchant Mehul Choksi) బెల్జియం సుప్రీంకోర్టు షాకిచ్చింది. మెహుల్ చోక్సీ అప్పీల్ ను బెల్జియం సుప్రీంకోర్టు తిరస్కరించిందని బ్రస్సెల్స్ అడ్వకేట్ జనరల్ హెన్రీ వాండర్లిండెన్( Henri Vanderlinden) వెల్లడించారు. దీంతో చోక్సీకి చుక్కెదురైంది. భారత్ చేసిన అప్పగింత అభ్యర్థనను సవాల్  చేస్తూ మెహుల్ చోక్సీ అప్పీల్ కోర్టులో అప్పీల్ చేశాడు. బెల్జియన్ కోర్ట్ ఆఫ్ కాసేషన్ మంగళవారం బ్రస్సెల్స్‌లో చోక్సీ పిటిషన్‌ను విచారించి భారతదేశానికి అనుకూలంగా తీర్పు ఇచ్చింది. మెహుల్ చోక్సీ(Mehul Choksi) పంజాబ్ నేషనల్ బ్యాంక్ ను రూ. 13 వేల కోట్లు మోసగించి విదేశాలకు పారిపోయాడు.

భారతదేశానికి పంపితే హింసకు గురయ్యే ప్రమాదం ఉందని పారిపోయిన చోక్సీ అక్టోబర్ 17న చేసిన వాదనను తోసిపుచ్చిన ఆంట్వెర్ప్ అప్పీళ్ల కోర్టు నిర్ణయాన్ని బెల్జియం అత్యున్నత న్యాయస్థానం సమర్థించిందని అధికారులు తెలిపారు. ఈ పరిణామం గురించి తెలిసిన అధికారులు ఇది భారత ప్రభుత్వానికి సానుకూల దశ అని, చోక్సీని అప్పగించడానికి బెల్జియం కోర్టులలో(Judiciary of Belgium) అధికారిక ప్రక్రియ ఇప్పుడు ప్రారంభం కావచ్చని అన్నారు. భారతదేశం అభ్యర్థన మేరకు ఏప్రిల్ 11న అరెస్టు అయిన తర్వాత ఆంట్వెర్ప్‌లోని జైలులో ఉన్న 65 ఏళ్ల చోక్సీ, అక్టోబర్ 30న బెల్జియన్ కోర్ట్ ఆఫ్ కాసేషన్‌ను ఆశ్రయించారు. 2018 -2022 మధ్య దాదాపు రూ. 13,000 కోట్ల విలువైన ఆరు బ్యాంకు మోసాలకు చోక్సీ పాల్పడినట్లు భారత దర్యాప్తు సంస్థలు ఆరోపించాయి.