చెన్నైలో బర్డ్‌ఫ్లూ

వందలాది కాకులు మృత్యువాత 

హెచ్5ఎన్1 ఏవియన్ ఇన్‌ఫ్లూయెంజా వైరస్‌గా నిర్ధారణ

తక్షణం స్పందించిన తమిళనాడు ప్రభుత్వం

వైరస్ కట్టడికి సమగ్ర చర్యలు

చెన్నై, ఫిబ్రవరి 6: తమిళనాడు రాజధాని చెన్నైలో బర్డ్‌ఫ్లూ విజృంభిస్తోంది. చెన్నై అంత టా వందలాది కాకులు చనిపోతున్నాయి. పరీక్షల్లో హెచ్5ఎన్1 ఏవియన్ ఇన్‌ఫ్లూయెంజా వైరస్‌గా నిర్ధారణ అయింది. దీంతో వైరస్ వ్యాప్తిని అరికట్టడానికి వైద్యాధికారు లు వేగంగా చర్యలు తీసుకుంటు న్నారు. తమిళనాడు ప్రభుత్వం మృతిచెందిన కాకులు, కోళ్లను దహనం చేయాలని, లేదా లోతుగా గోతితవ్వ పూడ్చిపెట్టాని ఆదేశాలు జారీ చేసింది. ఇటీవల చెన్నై నగరంలో వందలాది కాకులు చనిపోయాయి.

తర్వాత చెన్నైలో హెచ్5ఎన్1 వైరస్ వ్యాప్తి చెందిందని నిర్ధారణ అయ్యింది. ఈ వైరస్ మరింత వ్యాప్తి చెందకుండా బయోసెక్యూరిటీ ప్రోటోకాల్ ప్రకారం.. కాకులు, కోళ్ల కళేబరాలు అన్నింటినీ దహనం చేయాలని లేదా లోతుగా గోతితవ్వి పూడ్చిపెట్టాలని అధికారులను ప్రభుత్వం ఆదేశించింది. చనిపోయిన పక్షులను తాకొద్దని, తీసి పారేయవద్దని ప్రజలను హెచ్చరించింది. వాటిని చూసిన వెంటనే స్థానిక అధికారులకు తెలియజేయాలని కోరింది.

తక్షణ చర్యలు తీసుకోవాలి : కేంద్ర పశుసంవర్ధక శాఖ

నగరంలోని అడయార్ నుంచి సేకరించిన నమూనాల్లో బర్డ్‌ఫ్లూ ఉన్నట్లు నిర్ధారించారు. ఈ నేపథ్యంలో, కేంద్ర పశుసంవర్ధక మంత్రిత్వ శాఖ తమిళనాడు ప్రధానకార్యదర్శికి లేఖ రాసింది. వైరస్ వ్యాప్తిని అరికట్టడానికి తక్షణమే  సమగ్రంగా చర్యలు తీసుకోవాలని ఆదేశించింది. ‘హై పాథోజెనిక్ ఏవియన్ ఇన్‌ఫ్లూయెంజా (హెచ్‌పీఏఐ) పాజిటివ్ కేసు వైరస్ వేగంగా వ్యాప్తి చెందుతుండడంతో తీవ్రమైన ఆందోళన వ్యక్తం చేసింది.

ఈ పరిస్థితి జంతువులు, మానవ ఆరోగ్యంపై తీవ్రప్రభావం చూపుతోందని, ఈ సమస్యను అందరూ సమన్వయంతో పరిష్కరించాలని పేర్కొంది. మానవ ఆరోగ్యం, వన్యప్రాణులను కాపాడుకోవడానికి అందరూ కృషి చేయాలని, వన్-హెల్త్ విధానాన్ని అమలు చేయాలని సూచిస్తూ.. కేంద్ర పశుసంవర్ధక, పాడిపరిశ్రమ మంత్రిత్వ శాఖ తమిళనాడు ప్రభుత్వానికి లేఖలో పేర్కొంది. 

హెచ్5ఎన్1 అంటే ఏమిటి?

హెచ్5ఎన్1 అనేది ఇన్‌ఫ్లూయెంజా ‘ఏ’ వైరస్ అత్యంత వ్యాధికారక జాతి. ఇది ప్రధానంగా పక్షులకు, కోళ్లకు, అడవి పక్షులకు సోకుతుంది. దీనిని సాధారణంగా ‘బర్డ్ ఫ్లూ’ అని పిలుస్తారు. ఈ వైరస్ పక్షిజాతులకు అతివేగంగా వ్యాపిస్తుంది. తరచూ తీవ్రమైన అనారోగ్యం, అధిక మరణాల రేటును కలిగిస్తుంది. హెచ్5ఎన్1 ప్రధానంగా పక్షులను ప్రభావితం చేస్తుంది. కానీ అప్పుడప్పుడు మానవులకు కూడా ఈ వైరస్ సోకుతుంది. 

ఇతర జంతువులకు సోకిన పక్షులతో లేదా కలుషిత వాతావరణాలతో వ్యాప్తిచెందుతోంది. మానవ ఇన్ఫెక్షన్లు చాలా అరుదు. కానీ వస్తే మాత్రం తీవ్రంగా ఉంటాయి. అందుకే వ్యాప్తిని నిశితంగా అరికట్టడానికి కృషి చేస్తారు. దాని వ్యాప్తిని నివారించడానికి కఠినమైన బయోసెక్యూరిటీ చర్యలు అమలు చేయబడతాయి. హెచ్5ఎన్1 అత్యంత ప్రమాదకరమైనదిగా పరిగణిస్తారు. కానీ ప్రధానంగా ప్రజలకు కాకుండా నిర్దిష్ట పరిస్థితులలో, పక్షులలో, ఇది వేగంగా వ్యాప్తి చెందుతుంది. కోళ్లలో చాలా ఎక్కువ మరణాలతో పెద్ద వ్యాప్తికి కారణమవుతుంది.