11 March, 2026 | 2:34 PM 
పూటకో పార్టీ మార్చడం కడియం నైజం
- ఎన్టీఆర్, చంద్రబాబు, కేసీఆర్కు వెన్నుపోటు..
- మాజీ ఎమ్మెల్యే రాజయ్య
జనగామ, నవంబర్ 3 (విజయక్రాంతి): పూటకో పార్టీ మార్చడం కడియం శ్రీహరి నైజం అని, ఎన్టీఆర్, చంద్రబాబు, కేసీఆర్కు వెన్నుపోటు పొడిచిన ఘనుడు కడి యం శ్రీహరి అని స్టేషన్ఘన్పూర్ మాజీ ఎమ్మెల్యే తాటికొండ రాజయ్య విమర్శించారు. కడియం తన పదవికి రాజీనామా చేయకుంటే వీపు వాయిస్తామన్నారు.
ఆదివారం బీఆర్ఎస్ జనగామ జిల్లా కార్యాల యంలో ఆయన మాట్లాడారు. బీఆర్ఎస్ జెండాపై గెలిచిన కడియం.. తన కూతురు రాజకీయ స్వలాభం కోసమే కాంగ్రెస్లోకి వెళ్లారన్నారు. బీఆర్ఎస్ కార్యకర్తలను మోసం చేసిన ఆయన.. ఘన్పూర్ కాంగ్రెస్లో సుధీర్ఘ కాలంగా ఉంటున్న సింగపురం ఇందిరను తొక్కే ప్రయత్నం చేస్తున్నారని ఆరోపించారు.
కేసీఆర్ ఆస్తులెంత అని అడుగుతున్న కడియంకు 1994కు ముందు ఎన్ని ఆస్తులున్నాయో చెప్పాలన్నారు. త్వరలోనే పార్టీ ఫిరాయించిన స్థానాల్లో ఉప ఎన్నికలు రానున్నాయని, ఆ ఎన్నికల్లో కడియం చిత్తుగా ఓడిపోవడం ఖాయమని రాజయ్య ధీమా వ్యక్తం చేశారు. ఈ సమావేశంలో సెవెల్లి సంపత్, ఉడుగుల భాగ్య, బస్వగాని శ్రీనివాస్ తదితరులు పాల్గొన్నారు.
