1. ఇదే నినాదంతో తెలంగాణ రైజింగ్ గ్లోబల్ సదస్సు
2. ప్రపంచ స్థాయి వేడుకగా భారీ ఏర్పాట్లు
3. 3 వేల మంది ప్రముఖులకు సీఎం రేవంత్‌రెడ్డి ఆహ్వానం

హైదరాబాద్, నవంబర్ 28 (విజయక్రాంతి) : ‘తరలి రండి- ఉజ్వల తెలంగాణలో పాలుపంచుకోండి’  అనే నినాదంతో ప్రజాప్రభుత్వం తెలంగాణ రైజింగ్ గ్లోబల్ సమ్మిట్‌ను నిర్వహించనుంది. ఈ సమ్మిట్‌ను డిసెంబర్ 8, 9 తేదీల్లో హైదరాబాద్ భారత్ ఫ్యూచర్ సిటీలో నిర్వహించేందుకు భారీ ఎత్తున ఏర్పాట్లు చేస్తోంది. హైదరా బాద్ చరిత్రలోనే అత్యంత ప్రతిష్టాత్మకంగా ఈ అంతర్జాతీయ సదస్సు నిర్వహించాలని ముఖ్యమంత్రి రేవంత్ రెడ్డి  నిర్ణయించారు.

దేశ విదేశాలకు చెందిన దాదాపు 3 వేల మంది ప్రముఖులను ప్రభుత్వం ఈ సదస్సుకు ఆ హ్వానిస్తోంది. ప్రపంచ వ్యాప్తంగా పేరొందిన ప్రముఖులు, పారిశ్రామికవేత్తలు, టెక్నాలజీరంగ ప్రముఖులు ఈ జాబితాలో ఉన్నారు.

బ్రిటన్ మాజీ ప్రధాని టోనీ బ్లే ర్, ట్రంప్ మీడియా అండ్ టెక్నాలజీ గ్రూప్ డైరెక్టర్ ఎరిక్ స్విడర్, పారిశ్రామిక దిగ్గజం ఆనంద్ మహీంద్రా, యునైటెడ్ అరబ్ ఎమిరేట్స్ రాయల్ ఫ్యామిలీ సభ్యులు, వివి ధ కంపెనీల అంతర్జాతీయస్థాయి సీఈఓలు సదస్సుకు హాజరవనున్నారు. వివిధ రంగాల ప్రముఖులను సదస్సుకు ఆహ్వానించేందుకు స్వయంగా ముఖ్యమంత్రి రేవంత్ రెడ్డి పేరిట ప్రభుత్వం ఆహ్వన లేఖలను పంపిస్తోంది. 

సీఎం ఆహ్వాన లేఖలు..

 ‘వికసిత్ భారత్ 2047 జాతీయ వృద్ధి లక్ష్యాలకు అనుగుణంగా మా ప్రజాప్రభుత్వం ‘తెలంగాణ రైజింగ్ 2047’ డాక్యుమెంటును తయారు చేసింది. ఆర్థికవృద్ధి, అన్ని రంగాల ప్రగతి, అన్ని వర్గాల సంక్షేమం, సాధికారత, సమ్మిళిత వృద్ధి లక్ష్యంగా భవిష్యత్ తెలంగాణకు రో డ్‌మ్యాప్‌ను రూపొందించింది. ఈ లక్ష్యాలను మా ప్రభుత్వం సంకల్పాన్ని ప్రపంచ వేదికపై ప్రదర్శించేందు కు డిసెంబర్ 8, 9 తేదీల్లో హైదరాబాద్‌లో తెలంగాణ రైజింగ్ గ్లోబల్ సమ్మిట్ 2025ను నిర్వహిస్తున్నాం. తప్పకుండా తరలిరండి..’ అనే ఆహ్వాన సందేశంతో ఈ లేఖలు పంపించారు.

ప్రభుత్వం పంపించిన ఆహ్వానం అందుకున్న ప్రముఖుల్లో కొందరు సదస్సుకు హాజరవుతున్నట్లు ప్రకటించారు. తెలంగాణ ప్రగతి సంక్షేమాన్ని, అన్ని రంగాల్లో సాధించిన అభివృద్ధిని ప్రపంచానికి పరిచయం చేసేందుకు ఈ వేదికను అద్భుతంగా తీర్చిది ద్దాలని  ప్రభుత్వం భావిస్తోంది. ప్రపంచం నలుమూలా ల నుంచి పెట్టుబడులను ఆకర్షించటంతో పాటు గ్లోబల్ ఇన్నోవేషన్ దిశగా తెలంగాణకు ఉన్న అనుకూలతలను చాటిచెప్పాలని సంకల్పించింది. 

మెస్సీ కిక్‌తో ముగింపు

రెండు రోజుల పాటు జరిగే ఈ సదస్సులో డిసెంబర్ 9న తెలంగాణ రైజింగ్ 2047 డాక్యుమెంట్‌ను సీఎం రేవంత్‌రెడ్డి  ఆవిష్కరిస్తారు. డిసెం బర్ 13న  ప్రపంచ ఫుట్‌బాల్ దిగ్గజం లయనల్ మెస్సీ హైదరాబాద్‌కు రానున్నారు. ఆయన పాల్గొ నే వేడుకలోనే ప్రత్యేక ఫుట్‌బాల్ మ్యాచ్ నిర్వహిస్తారు. తెలంగాణ రైజింగ్ గ్లోబల్ సదస్సుకు ఇది ప్ర త్యేక ఆకర్షణగా, ముగింపు ఘట్టంగా నిలువనుంది.