- బీజేపీ రంగారెడ్డి అర్బన్ జిల్లా మాజీ అధ్యక్షుడు సామ రంగారెడ్డి

- ఎల్బీనగర్ లో బీజేపీ నాయకుల ఆందోళన

ఎల్బీనగర్: కాంగ్రెస్ పార్టీ ఎన్నికల ముందు కామారెడ్డిలో ప్రకటించిన బీసీ డిక్లరేషన్ అమలు చేస్తామని హామీ ఇచ్చి, అధికారంలోకి వచ్చిన తర్వాత 17శాతం రిజర్వేషన్ ఇచ్చి బీసీలను మోసం చేసిందని బీజేపీ రంగారెడ్డి అర్బన్ జిల్లా మాజీ అధ్యక్షుడు సామ రంగారెడ్డి అన్నారు. బీసీలకు 42 శాతం రిజర్వేషన్ ఖరారు చేయాలంటూ బీజేపీ నాయకులు శనివారం ఎల్బీనగర్ చౌరస్తాలో ఆందోళన చేపట్టారు. నిరసనలో భాగంగా రేవంత్ రెడ్డి ఫొటోతో ఉన్న ఫ్లెక్సీ ని తగలబెడుతుండగా పోలీసులు అడ్డుకున్నారు.

ఈ సందర్భంగా పోలీసులకు బీజేపీ నాయకులు మధ్య తోపులాట,వాగ్వివాదం జరిగింది. అనంతరం బీజేపీ నాయకులు రోడ్డుపై బైఠాయించి ఆందోళన చేపట్టారు. ఈ సందర్భంగా సామ రంగారెడ్డి మాట్లాడుతూ... కాంగ్రెస్ ప్రభుత్వం 42శాతం బీసీ రిజర్వేషన్ అమలు చేయాలని డిమాండ్ చేశారు. 2023లో కాంగ్రెస్ పార్టీ ప్రకటించిన  కామారెడ్డి డిక్లరేషన్ ను వెంటనే అమలు చేయాలని డిమాండ్ చేశారు. కాంగ్రెస్ పార్టీ మోసపూరిత హామీలు ఇస్తూ బీసీలను విద్య, ఉద్యోగ, రాజకీయ రంగాలల్లో రీత్యా అణిచివేస్తున్నారని ఆరోపించారు. బీసీలను మోసం చేసిన కాంగ్రెస్ పార్టీకి స్థానిక సంస్థల ఎన్నికల్లో తగిన బుద్ధి చెప్పుతామని హెచ్చరించారు. కార్యక్రమంలో కార్పొరేటర్ పవన్ కుమార్,  బీజేవైఎం నాయకుడు చింతల సురేందర్ యాదవ్, బీజేపీ నాయకులు పాల్గొన్నారు.