న్యూఢిల్లీ: ఢిల్లీలో జంతర్ మంతర్ వద్ద నేడు కాంగ్రెస్ పార్టీ మహాధర్నా(Congress Maha Dharna) చేస్తోంది. ఏఐసీసీ అధ్యక్షుడు మల్లికార్జున ఖర్గే మహా ధర్నాను ప్రారంభించనున్నారు. బీసీ రిజర్వేషన్ల బిల్లును రాష్ట్రపతి ఆమోదించాలని కోరుతూ ఢిల్లీలో ధర్నాకు దిగారు. ధర్నాలో సీఎం రేవంత్ రెడ్డి(CM Revanth Reddy), పీసీసీ అధ్యక్షుడు మహేష్ కుమార్ గౌడ్ పాల్గొనున్నారు. గురువారం రాష్ట్రపతిని కలిసి విజ్ఞప్తి చేసేందుకు ముఖ్యమంత్రి అపాయింట్ మెంట్ కోరారు. బీసీ రిజర్వేషన్ల పోరాటం ఇప్పుడు దేశ రాజధానికి చేరుకుంది. ముఖ్యమంత్రి రేవంత్ రెడ్డి బుధవారం ఢిల్లీలోని జంతర్ మంతర్ వద్ద భారీ నిరసనకు నాయకత్వం వహించనున్నారు. స్థానిక సంస్థల ఎన్నికలు, విద్య, ఉపాధి రంగాలలో వెనుకబడిన తరగతులకు 42శాతం(BC Reservation) రిజర్వేషన్లు కల్పించే బిల్లులను ఆమోదించాలని డిమాండ్ చేస్తున్నారు.

ముఖ్యమంత్రి, ఆయన మంత్రివర్గ సహచరులు మంగళవారం సాయంత్రం న్యూఢిల్లీ చేరుకున్నారు. సోమవారం ఉదయం చర్లపల్లి స్టేషన్ నుండి ప్రత్యేక రైలు బయలుదేరింది. ముఖ్యమంత్రి, మంత్రులకు న్యూఢిల్లీలోని తెలంగాణ భవన్(Telangana Bhavan) అంతటా, దేశ రాజధానిలోని అనేక ప్రదేశాలలో బ్యానర్లు, పోస్టర్లుతో స్వాగతం పలికారు. కేంద్ర ప్రభుత్వంపై ఒత్తిడి పెంచేందుకు సీఎం రేవంత్ రెడ్డి నేడు జంతర్ మంతర్ వద్ద ధర్నా చేయనున్నారు. డిప్యూటీ సీఎం మల్లు భట్టి విక్రమార్క, టీపీసీసీ అధ్యక్షుడు మహేష్ కుమార్ గౌడ్, పలువురు మంత్రులు, ఎమ్మెల్యేలు, ఎమ్మెల్సీలు, కార్పొరేషన్ చైర్మన్లు, బీసీ వర్గాల నాయకులు ఆయనతో పాటు హాజరు కానున్నారు. లోక్‌సభలో ప్రతిపక్ష నాయకుడు రాహుల్ గాంధీ(Rahul Gandhi) ఈ నిరసన కార్యక్రమానికి హాజరై తన సంఘీభావాన్ని తెలియజేస్తారని భావిస్తున్నారు. సమాజ్‌వాదీ పార్టీ, డీఎంకే, వామపక్ష పార్టీలు, శివసేన (యూబీటీ), ఎన్‌సీపీ (ఎస్పీ) సహా ఇండియా బ్లాక్ పార్టీల నాయకులు కూడా పాల్గొని సీఎం రేవంత్ రెడ్డి నాయకత్వంలో జరుగుతున్న పోరాటానికి మద్దతు తెలుపుతారు.