హైదరాబాద్: ప్రముఖ కవి, రచయిత అందెశ్రీ(Ande sri passes away) సోమవారం ఉదయం గాంధీ ఆసుపత్రిలో చికిత్స పొందుతూ కన్నుమూశారు. ఆయన వయసు 64 సంవత్సరాలు. ఆదివారం అర్ధరాత్రి సమయంలో ఆయన ఆరోగ్యం క్షీణించడంతో అస్వస్థతకు గురయ్యారు. లాలాగూడలోని తన ఇంట్లో ఆయన కుప్పకూలిపోయారు. కుటుంబ సభ్యులు వెంటనే ఆయనను గాంధీ ఆసుపత్రికి తరలించారు. ఉదయం 7.30 గంటల ప్రాంతంలో ఆయన తుది శ్వాస విడిచినట్లు వైద్యులు తెలిపారు. ప్రముఖ కవి అందెశ్రీ సిద్దిపేటలో జన్మించారు. అతని అసలు పేరు అందె ఎల్లయ్య. ఆయనకు ముగ్గురు కుమార్తెలు, ఒక కుమారుడు ఉన్నారు. అధికారిక విద్య లేనప్పటికీ, ఆయన ప్రముఖ కవి, రచయితగా ఎదిగారు. కాకతీయ విశ్వవిద్యాలయం డాక్టరేట్ పట్టా పొందారు.

"మాయమై పోతున్నడమ్మ" అనే రచన ఆయనకు ప్రజాదరణను తెచ్చిపెట్టింది. ప్రత్యేక తెలంగాణ ఉద్యమంలో ఆయన కీలక పాత్ర పోషించారు. ఈ సంవత్సరం జూన్ 2న ముఖ్యమంత్రి రేవంత్ రెడ్డి ఆయనను సత్కరించి నగదు పురస్కారాన్ని అందజేశారు. తెలంగాణ రాష్ట్ర గీతం “జయ జయహే తెలంగాణ” రాసిన అందెశ్రీ మరణం పట్ల ముఖ్యమంత్రి రేవంత్ రెడ్డి సంతాపం వ్యక్తం చేశారు. కవి మరణం తెలంగాణ సాహిత్యానికి తీరని లోటని ఆయన అన్నారు. ప్రత్యేక తెలంగాణ ఉద్యమ సమయంలో ఆయన పాటలు కీలక పాత్ర పోషించాయని ముఖ్యమంత్రి పేర్కొన్నారు. ఆయనతో తనకున్న అనుబంధాన్ని గుర్తు చేసుకున్నారు. కవిని కోల్పోయిన కుటుంబ సభ్యులకు ఆయన సంతాపం తెలిపారు. ఆయన అంత్యక్రియలను ప్రభుత్వ లాంఛనాలతో నిర్వహించాలని ముఖ్యమంత్రి అధికారులకు ఆదేశాలు జారీ చేశారు.

 అందెశ్రీకి మంత్రులు, మాజీ మంత్రుల సంతాపం 

ప్రముఖ కవి, రచయిత అందెశ్రీ మృతి పట్ల ఉప ముఖ్యమంత్రి భట్టి విక్రమార్క, మంత్రులు ఉత్తమ్ కుమార్ రెడ్డి, దామోదర రాజనర్సింహ, కోమటిరెడ్డి వెంకటరెడ్డి, శ్రీధర్ బాబు, పొంగులేటి శ్రీనివాస్ రెడ్డి, పొన్నం ప్రభాకర్, కొండా సురేఖ, సీతక్క, తుమ్మల నాగేశ్వర రావు, జూపల్లి కృష్ణరావు, గడ్డం వివేక్ వెంకట స్వామి, అడ్లూరి లక్ష్మణ్, వాకిటి శ్రీహరి, మొహమ్మద్ అజహరుద్దీన్, స్పీకర్ గడ్డం ప్రసాద్ కుమార్, మాజీ మంత్రులు హరీశ్ రావు, కేటీఆర్ తో పాటు ఎమ్మెల్యేలు, ఎంపీలు, పలువురు నాయకులు సంతాపం తెలిపారు.

అందెశ్రీ పురస్కారాలు

అందెశ్రీకి గౌరవ డాక్టరేట్ అందించిన కాకతీయ యూనివర్సిటీ

ఆశు కవిత్వం చెప్పడంలో అందెశ్రీ దిట్ట

2006లో గంగ సినిమాకు అందెశ్రీకి నంది పురస్కారం

2014లో అకాడమిఆఫ్ యూనివర్సల్ గ్లోబల్ పీస్ డాక్టరేట్

2015లో దాశరథి సాహితీ పురస్కారం అందుకున్న అందెశ్రీ

2015లో రావూరి భరద్వాజ సాహితీ పురస్కారం

2022లో అందెశ్రీకి జానకమ్మ జాతీయ పురస్కారం

2024లో దాశరథీ కృష్ణమాచార్య సాహితీ పురస్కారం

లోక్‌ నాయక్‌ పురస్కారం