బిఆర్ఎస్ రాష్ట్ర ప్రధాన కార్యదర్శి ఆర్.ఎస్. ప్రవీణ్ కుమార్

ఎమ్మెల్యే కోవ లక్ష్మి అధ్యక్షతన దీక్ష దివాస్ 

హాజరైన మాజీ ఎమ్మెల్యే కోనేరు కోనప్ప

కుమ్రం భీం ఆసిఫాబాద్,(విజయక్రాంతి): పోరాటాలకు మారుపేరు కేసీఆర్ అని బీఆర్‌ఎస్ రాష్ట్ర ప్రధాన కార్యదర్శి ఆర్.ఎస్. ప్రవీణ్ కుమార్ అన్నారు. దీక్షా దివాస్ సందర్భంగా శనివారం జిల్లా కేంద్రంలోని తెలంగాణ భవన్ లో స్థానిక ఎమ్మెల్యే కోవ లక్ష్మి అధ్యక్షతన నిర్వహించిన కార్యక్రమానికి పార్టీ రాష్ట్ర ప్రధాన కార్యదర్శి ఆర్ఎస్ ప్రవీణ్ కుమార్, మాజీ ఎమ్మెల్యే కోనేరు కోనప్ప హాజరయ్యారు. ఈ సందర్భంగా ఆర్ఎస్పి మాట్లాడుతూ కాంగ్రెస్ ప్రభుత్వం కుట్రపూరిత చర్యలు తీసుకుంటోందన్నారు. రైతు, కూలి, నిరుపేద, విద్యార్థి భవిష్యత్తు ప్రమాదంలో పడుతోందని తెలిపారు. బీఆర్‌ఎస్ ఎప్పుడూ ప్రజల కోసం నిలబడిందని ,ఇకముందు మరింత ఉగ్రరూపంలో పోరాటం చేస్తుందన్నారు. ప్రజా సంక్షేమ పథకాల్ని బలహీనపరిచే విధానాలను వెంటనే ఉపసంహరించుకోవాలని డిమాండ్ చేశారు.

కేసిఆర్ హయాంలోనే అభివృద్ధి – కోవ లక్ష్మి

బిఆర్ఎస్ ప్రభుత్వ హయాంలో కెసిఆర్ అమలు చేసిన సంక్షేమ పథకాలు ప్రజల గుండెల్లో చిరకాలం నిలిచిపోతాయన్నారు. కేంద్ర, రాష్ట్ర ప్రభుత్వాలు రైతుల అభివృద్ధి, గిరిజన సంక్షేమం, బడుగు బలహీన వర్గాల పురోగతికి అవరోధాలు సృష్టిస్తోంది అన్నారు. ప్రత్యేకంగా గిరిజన ప్రాంతాల్లో  ప్రజలు కష్టాల్లో ఉన్నారని ఆమె మండిపడ్డారు.

తెలంగాణ ప్రజల పక్షాన నిలబడేది బీఆర్‌ఎస్ మాత్రమే – కోనేరు కోనప్ప

తెలంగాణ ప్రజల పక్షాన నిలబడి పోరాటం చేసేది బిఆర్ఎస్ పార్టీ మాత్రమే అన్నారు. తెలంగాణను వెనక్కు లాగే నిర్ణయాలతో కేంద్రం ముందుకు  పోతుందన్నారు. కాంగ్రెస్ ప్రభుత్వం ప్రజలకు ఇచ్చిన హామీలను పూర్తిస్థాయిలో అమలు చేయడంలో విఫలమైందన్నారు. ప్రజలకు అండగా నిలిచేది, వారి సమస్యల్ని తీర్చేది బీఆర్‌ఎస్ ఒక్కటే అన్నారు. కార్మికులు, వ్యవసాయ కూలీలు, చిన్న వ్యాపారులు ఎదుర్కొంటున్న కష్టాలపై ప్రభుత్వాలు స్పందించాలన్నారు. ఈ కార్యక్రమంలో సింగిల్ విండో చైర్మన్ అలీబిన్ అహ్మద్, టీబీజీకేఎస్ ఏరియా ఉపాధ్యక్షుడు శ్రీనివాసరావు, మాజీ సర్పంచ్ సరస్వతి, బీఆర్‌ఎస్ నాయకులు శంకరమ్మ, గంధం శ్రీనివాస్, ని సార్ ,హైమద్ ,రవీందర్, శ్రీధర్ రెడ్డి, కొంగ సత్యనారాయణ, శ్యామ్ రావు, బుర్సా పోచయ్య , కార్యకర్తలు తదితరులు పాల్గొన్నారు.