రామ్ పోతినేని హీరోగా నటిస్తున్న చిత్రం ‘ఆంధ్ర కింగ్ తాలూకా’. మైత్రి మూవీ మేకర్స్ నిర్మిస్తున్న ఈ చిత్రానికి మహేశ్‌బాబు పీ దర్శకత్వం వహిస్తున్నారు. భాగ్యశ్రీ బోర్సే కథానాయికగా నటిస్తున్న ఈ సినిమాలో కన్నడ సూపర్ స్టార్ ఉపేంద్ర ఆన్-స్క్రీన్ సూపర్ స్టార్ పాత్రను పోషిస్తున్నారు. ఈ చిత్రం నవంబర్ 27న థియేటర్లలోకి వస్తోంది. ఈ సందర్భంగా డైరెక్టర్ మహేశ్‌బాబు విలేకరులతో సినిమా విశేషాలను పంచుకున్నారు.

ఈ సినిమాకు ‘ఆంధ్ర కింగ్ తాలూకా’ అనే టైటిల్ పెట్టడానికి కారణం?

-ఈ టైటిల్ వెనుక చాలా అర్థం ఉంది. అది మీరు సినిమా చూస్తున్నప్పుడు తెలుస్తుంది. 

-ఈ సినిమా 2002 టైమ్‌లో జరుగుతుంది. అప్పుడు రెండు రాష్ట్రాలు కలిసి ఉండేవి. కాబట్టి టైటిల్ అలా పెట్టాం. కన్నడలోనూ ఇదే టైటిల్‌తో రిలీజ్ చేస్తున్నాం. అయితే, స్క్రిప్ట్ దశలో దీని పేరు ‘ఆంధ్ర కింగ్’ పెట్టాను. తర్వాత డైలాగ్ వెర్షన్ దశలో సీన్ రాస్తున్నప్పుడు అందులో ఎవరి తాలూకా అని డైలాగ్ వస్తుంది. అప్పుడు హీరో తన ఐడెంటిటీగా ఫీల్ అవుతున్న ఎమోషన్‌ను ఆంధ్ర కింగ్ తాలూకా అని పెట్టాం. 

‘ఆంధ్ర కింగ్’ క్యారెక్టర్ కోసం ఉపేంద్రను తీసుకోవడానికి కారణం?

-రానా, ఉపేంద్రతో ఒక ఇంటర్వ్యూ చేయడం చూశాను. అందులో ఉపేంద్ర ‘నేను బయటకంటే సినిమాలోనే రియల్ మనిషి’ అని చెప్పారు. ఆ మాట నాకు చాలా కనెక్ట్ అయింది. అప్పుడే సూర్య అనే క్యారెక్టర్ ఇలా ఉంటుందనిపించింది. సూర్య పాత్ర కోసం మేము ఆయన్నే సంప్రదించాం. ఉపేంద్రకు హార్డ్ కోర్ ఫ్యాన్స్ ఉన్నారు. సూర్యలో అందరు స్టార్స్ కనిపిస్తారు. ఉపేంద్ర గ్రేట్ హ్యూమన్ బీయింగ్. ఆయన్ను కలిసిన తర్వాత ఆయన గురించి మరింత తెలుసుకున్నాను. 

ఇది ఫ్యాన్ బయోపిక్ అన్నారు కదా.. మీకు అలా ఇన్‌స్పైర్ చేసిన ఫ్యాన్స్ ఎవరైనా ఉన్నారా?

-ఒక్క పర్సన్, ఇన్సిడెంట్ అని చెప్పలేను. చాలా రోజుల క్రితం ఒక సినిమాకు వెళ్లాను. ఆ సినిమా నాకు అంతగా నచ్చలేదు. కానీ, నా పక్కన ఉన్న ప్రేక్షకుడు ఆ డైలాగులకు చాలా ఇన్‌స్పైర్ అవుతున్నాడు. ప్రతి డైలాగ్‌కూ కనెక్ట్ అవుతున్నాడు, నిజానికి అక్కడ ఉన్న హీరోతో తనకు వ్యక్తిగతంగా ఎలాంటి కనెక్షన్ ఉండదు. కానీ తను చెప్పే ప్రతి మాటకూ ఇన్‌స్పైర్ అవడమనేది నాకు చాలా కనెక్టింగ్‌గా అనిపించింది. అలాంటి కథను ఎవరూ చెప్పలేదనిపించింది. 

-సౌత్ ఇండియాలో హీరోలను మన జీవితంలో ఒక అంతర్భాగంగా చూస్తాం. అలా స్టార్, ఫ్యాన్ రిలేషన్‌లో నాకు చాలా ఎమోషన్స్ కనిపించాయి. అలా ఒక కథ చెప్పొచ్చు అనిపించింది.  అభిమానిని ఆధారంగా చేసుకుని కొన్ని సినిమాల్లో  వచ్చాయి కానీ ఇలాంటి కథతో ఇప్పటివరకు సినిమా రాలేదు. ఇందులో నేను చెబుతున్న కథ పూర్తి విభిన్నంగా, చాలా కొత్తగా ఉంటుంది. 

ఈ కథ రామ్‌కు చెప్పినప్పుడు ఆయన స్పందన ఏమిటి?

-మైత్రి మూవీ మేకర్స్‌కు ఈ కథ చెప్పినప్పుడు చాలా ఎక్సైట్ అయ్యారు. రామ్ అప్పటికే చాలా పెద్ద స్టార్ డైరెక్టర్లతో పనిచేశారు.. నేనేమో ఒకే సినిమా చేసిన దర్శకుడిని. రామ్ కాల్ చేసి ‘20 నిమిషాల్లో కథ చెప్పగలవా’ అన్నారు. నేను అప్పటికే పూర్తి కథ రాసుకున్నాను. ఆయనకు ఏది చెప్పాలి.. ఏది చెప్పకూడదని రాత్రంతా ఆలోచించాను. మొత్తానికి పూర్తి కథ విన్నారు.. నచ్చిందో లేదో వెంటనే చెప్పలేదు. తర్వాత మైత్రి మూవీ మేకర్స్ నుంచి నాకు కాల్ వచ్చింది. ‘ఆయన ఫస్ట్ సిట్టింగ్‌లో ఓకే చేసిన కథ ఇదే’ అని చెప్పారు. చాలా ఆనందంగా అనిపించింది. 

ఈ సినిమాలో ఫ్యాన్ బాయ్‌గా రామ్‌ను ఎంచుకోవడానికి కారణం?

-రామ్ చాలా వెర్సటైల్ యాక్టర్. ఆయన క్యారెక్టర్‌లో పెర్ఫార్మెన్స్‌లో చాలా ఎనర్జీ ఉంటుంది. నేను రాసుకున్న పాత్రకు గొప్ప ఎనర్జీ కావాలి. ఒక ఫ్యాన్ ఎలా ప్రవర్తిస్తాడో, ఎంత మాస్‌గా ఉంటాడో అలాంటి పెర్ఫార్మర్ కావాలి. ఇలాంటి పాత్రకు రామ్ పర్ఫెక్ట్. -ఈ సినిమాకు నేనూ, రామ్ అద్భుతమైన వేవ్ లెంత్‌లో వర్క్ చేశాం. ఇద్దరం ఒకటే అన్నట్టుగా పనిచేశాం. ఇప్పటివరకు రామ్ చేసిన సినిమాలు వేరు ఇది వేరు. ఈ మాట మనస్ఫూర్తిగా చెప్తున్నా. రామ్ ఈ పాత్రను ఇంత అద్భుతంగా చేయడానికి అభిమానులే ఆయనకు స్ఫూర్తి. 

భాగ్యశ్రీ పాత్ర ఎలా ఉంటుంది..?

-భాగ్యశ్రీ పాత్ర ఈ కథలో చాలా కీలకం. ఒక జీవితాన్ని చూసినట్టుంటుంది. మురళీశర్మ, రావు రమేశ్, సత్య, రాహుల్ రామకృష్ణ.. ఇలా ఇందులో ఉండే ప్రతి క్యారెక్టర్ ఒక ఎమోషన్‌తో ఉంటుంది. 

మీరు వ్యక్తిగతంగా ఎవరిని అభిమానిస్తారు?

-నాకు చిన్నప్పుడు పరిచయమైంది పవన్‌కళ్యాణ్, ఆయనంటే చాలా అభిమానం. అలా అని ఈ టైటిల్ పెట్టలేదు (నవ్వుతూ) తర్వాత సినిమాలో పనిచేస్తున్నప్పుడు మా గురువు కృష్ణవంశీకి ఫ్యాన్‌గా మారిపోయా. ఆయనతో పని చేస్తున్నప్పుడు చాలా ఆరాధించేవాడిని. ఆయన నాకు ఒక గొప్ప మాట చెప్పారు. ‘నీకు నేనంటే కాదు సినిమా అంటే ఇష్టం. సినిమా పట్ల ఇష్టంతో నువ్వు ఇక్కడికి వచ్చావు. నేను దానికి ఒక టూల్‌లాగా ఉపయోగపడ్డాను. ఇకపై నువ్వు సినిమానే ప్రేమించాలి’ అని! ఆ మాట నన్ను చాలా కదిలించింది. 

మ్యూజిక్ గురించి... 

-వివేక్ మెర్విన్ అద్భుతమైన ఆల్బమ్ ఇచ్చారు. వాళ్ల ద్వారా ప్రేక్షకుల నుంచి మరింత అటెన్షన్ వచ్చింది. చిన్ని గుండెలో నా ఫేవరెట్ సాంగ్. నువ్వుంటే చాలు పాట కూడా నాకు చాలా ఇష్టం. ఇందులో చంద్రబోస్ రాసిన ఇంకో రెండు పాటలున్నాయి. ఒక మంచి థీమ్ సాంగ్ కూడా ఉంది. అదీ నా ఫేవరెట్. సినిమాలో మ్యూజిక్ చాలా ప్రత్యేకంగా ఉంటుంది. ప్రేక్షకులు చాలా ఎంజాయ్ చేస్తారు.  

రామ్ ఈ సినిమాలో పాటలు రాయడం ఎలా అనిపించింది?

-నిజంగా రామ్‌కు పాటలు రాసే టాలెంట్ ఉందని నాకు తెలియదు. ఆయనకు మ్యూజిక్ పట్ల విపరీతమైన నాలెడ్జ్. మ్యూజిక్ సిట్టింగ్స్‌కు తప్పకుండా వస్తారు. ఒక ట్యూన్ గురించి డిస్కస్ చేస్తున్నప్పుడు అందులో ఉన్న ఎమోషన్‌ను ఆయనే మాటలు రూపంలో చెప్పారు. అది నాకు చాలా నచ్చింది. తర్వాత పల్లవి కూడా రాశారు. అది మాకు అన్ని విధాలుగా ప్లస్ అయింది.  

ఇది ఫ్యాన్స్ గురించి తీసిన సినిమా కదా.. మరి షూటింగ్ జరుగుతున్నప్పుడు రామ్ ఫాన్స్ వచ్చి కలిశారా?

-అల్యూమినియం ఫ్యాక్టరీలో షూటింగ్ చేస్తున్నప్పుడు ఫ్యాన్స్ విపరీతంగా వచ్చేవారు. అంత మంది జనం చూసినప్పుడు అక్కడ ఏదైనా షూటింగ్ జరుగుతుందనుకునేవాడిని. కానీ రామ్ రాత్రి ఒంటిగంట వరకు ప్రతి ఒక్కరికి ఫోటోలు ఇచ్చేవారు. రామ్‌కు అభిమానులంటే చాలా ప్రేమ. వాళ్ల గురించి ఎప్పుడూ చాలా గొప్పగా మాట్లాడుతుంటారు.