calender_icon.png 29 November, 2025 | 5:05 PM

  • top-fb.png
  • top-tw.png
  • top-insta.png
  • top-yt.png

దివ్యాంగులను ప్రోత్సహిస్తే అన్ని రంగాలలో రాణిస్తారు

29-11-2025 04:26:48 PM

అదనపు కలెక్టర్ లక్ష్మీనారాయణ

గద్వాల: దివ్యాంగులు మనోధైర్యంతో, ఆత్మవిశ్వాసంతో ఉంటారని, వారిని ప్రోత్సహిస్తే అన్ని రంగాల్లో రాణిస్తారని అదనపు కలెక్టర్ లక్ష్మీనారాయణ అన్నారు. అంతర్జాతీయ దివ్యాంగుల దినోత్సవ వారోత్సవాల్లో భాగంగా శనివారం మహిళా, శిశు, దివ్యాంగుల, వయోవృద్ధుల సంక్షేమ శాఖ ఆధ్వర్యంలో గద్వాల ఇండోర్ స్టేడియంలో జిల్లా స్థాయి దివ్యాంగుల ఆటల పోటీల కార్యక్రమానికి ముఖ్య అతిథిగా అదనపు కలెక్టర్ హాజరై మాట్లాడారు. దివ్యమైన అవకాశం ఉన్నవారే దివ్యాంగులని, భగవంతుడు తమకు ఏదో లోటు ఇచ్చాడని భావించకూడదన్నారు. అంతర్జాతీయ స్థాయిలో వివిధ రంగాల్లో ప్రతిభ చాటిన దివ్యాంగుల జీవిత చరిత్రల పుస్తకాలు చదివితే, స్ఫూర్తినిచ్చే వీడియోలు చూడడం ద్వారా ప్రతి ఒక్కరిలో ఆత్మవిశ్వాసం పెరుగుతుందన్నారు.

ప్రతి ఒక్కరూ క్రీడలను తమ జీవితంలో ఒక భాగం చేసుకోవాలని దివ్యాంగులను సైతం ప్రోత్సహిస్తూ ఈ క్రీడా పోటీలు నిర్వహించడం అభినందనీయమన్నారు. క్రీడలతో శారీరకంగా దృఢంగా ఉండడమే కాక, మానసికంగా చురుగ్గా ఆలోచించేందుకు అవకాశం ఉందన్నారు. ఉత్సాహంగా ఉన్నవారికి మంచి ఆలోచనలు వస్తాయని,  ఫలితంగా వారి విధుల్లో ప్రతిభ చాటడమే కాక సమాజ అభివృద్ధికి కృషి చేస్తారన్నారు. జిల్లాలో మూడు నైబర్హుడ్ కేంద్రాలు ఏర్పాటు చేశారని ఇక్కడ శారీరకంగా, మానసికంగా ఇబ్బందులు ఎదుర్కొంటున్న వ్యక్తులకు అవసరమైన చికిత్స అందించటమే కాక ఇతర సౌకర్యాలు కల్పించడం జరిగిందన్నారు.

దివ్యాంగులు ఏ విషయంలోనూ తక్కువ కాదని ప్రభుత్వ సంక్షేమ పథకాలను సద్వినియోగం చేసుకొని ఉన్నత చదువులు అభ్యసించాలని, అన్ని రంగాల్లో రాణించాలని పిలుపునిచ్చారు. జిల్లా స్థాయిలో నిర్వహిస్తున్న క్రీడల్లో ప్రతిభ చాటినవారు రాష్ట్రస్థాయిలోనూ గెలుపొంది జోగులాంబ గద్వాల ఖ్యాతిని ఇనుమడింపజేయాలని ఆకాంక్షించారు. అనంతరం క్యారమ్స్, చెస్, జావిలిన్ త్రో, షాట్ పుట్, రన్నింగ్ పోటీలను అధికారులు ప్రారంభించారు. ఈ కార్యక్రమంలో డిఎస్పి మొగిలయ్య, జిల్లా సంక్షేమ అధికారిని సునంద, విద్యా శాఖ అధికారిని విజయలక్ష్మి, డివైఎస్ఓ కృష్ణయ్య, డిఎంహెచ్వో సంధ్య కిరణ్మయి, డిఆర్డిఏ ఏపీడి శ్రీనివాసులు, డిసిపిఓ నరసింహా, తదితరులు పాల్గొన్నారు.